Breaking News: CDF-Paletwa Camp Lei Ah SAC Ralkap Nih Rallam An Sial! Chin ramkulh Paletwa peng mizapi vengtu CDF-Paletwa camp lei panh in SAC ralkap nih rallam hmun 3 ah an sial i, an kalhnawh hna. SAC ralkap hna cu an dihlak 300 leng an si, tiah theih a si. SAC ralkap hna cu Mechung khua Pawah le Yaungwah pawng ah camp an i ser khawh i, Wading le Sawngwah khua pawng zong ah camp an i ser khawh tiah anmah ngiathlaitu hna nih cun an ruah. CDF-Paletwa batallion 1 lei ah kahdohnak a chuak kho, tiah an pawngkam khua hna cu ralrinnak pek an si tiah mipi vengtu ralkap lutlai nih social media cahmai ah ralrin peknak caṭial an taar.

Thawngdang A luancia June 28 ah Myanmar-India ramri ah a ummi Lailenpi khua in Matupi lei ah a raami SAC ralkap pawl nih an sinah aa telmi raifanh in a zawmi ralkap pahnih cu an phorh hna. Lailenpi le Matupi karlak hi mawṭaw in cun nikhat chung kal a si.Asinain SAC ral kap pawl cu hriam he, ṭaung he ke in an kal caah an ruahning tluk in an lam a tluang lo. A zawmi le hliam a pumi pawl zong an lam thluan ah an i tel. Cubantuk lam har ah sii tlamtlin lo ruangah a zawmi an hawile cu an thah hna.

Lailenpi le Aayu khua karlak ah kahdohnak a um lo. Kanmah lei mi zong an um lo. Kahdohnak chungah raifanh nih a tlunhmi an hawile pahnih ruak kan hmuh. Cun Amlai le Yankhan khua karlak kahdohnak ah hma a pumi 2 zong an thah hna tiah thilfiang a theimi pakhat nih Mizzima ah a chim.

Cun July 6-7 kahdohnak ah a thimi ralkap ruak pawl cu inntang le lamkam ah an hlonh hna i CDF-Matupi nih an khanghpiak hna. Ahlan ahcun ralram kan kal tikah, ka nau nang cu um ko, nupi le fa he na si tiah zawn i ruah a si. Sihmanh sehlaw atu ahcun kahdohnak a um tikah zeitik dah ka zaam lai ti a bawhmi lawngte an si” tiah ralkap hlun pakhat nih Mizzima ah a chim.

Ralkap a lutmi pawl zong hi fimnak ṭha tein a ngei lomi an si i a leng an um lio zongah an duh poah a ṭhudir mi an si. Ralkap chung an um tik zongah an duh poah in an um ṭhiam i ralram an kal tikah mipi innlo khangh, fir le thahnak hna an duh poah in an tuah. Khuachung an rak luh tikah, hnahnawhnak kan pe hlah uh! Hna na kan hnawh cun nan khua kan khangh dih lai.

Hnahnawhnak a kan pemi khua pawl an khanghmi a tlawm ti lo. Nan khua ah meithal kuankhat a puah cun atu bantuk in inn khanghpiak nan si lai tiah inn 3 an khangh tak khanghpiak a tongmi khuami nih Mizzima ah a chim. Lailenpi le Matupi karlak ah SAC ralkap le CDF-Matupi cu kahdohnak voi 4 a chuak i SAC ralkap 15 an thi tiah theih a si.