Breaking News: CDF Nih Ralhrang 20 Ceilak In An Thah Hna 8 An Tuar Chap Rih. CDF le YDF i Bawm in SAC Ralhrang he Kahdohnak ah Ralhrang 20 Hrawng an Thi, CDF in Minung 8 Hliampu. Nihin Sep. 6 zaanlei suimilam 4:00 hrawng in Chinram le Magwe ramtthen ramri, Saw peng chung ah CDF-Kanpetlet le Saw mipi hriamtlai bu YDF-Saw i bawm in SAC ralhrang he kahdohnak a chuak i ralhrang 20 hrawng an thi, tiah CDF nih thawngpang an chuah. Nihin zaanlei kahdohnak hi suimilam pahnih hrawng a rau i, CDF in minung 8 hliam (fak lo) an pu. YDF in minung 3 hliam (fak lo) an pu ve hna.

Thawngdang CDF Thantlang Nih CDM A lutmi SAC ralkap le palek cu sing 60 kan in pek hna lai tiah cathanh an chuah Sept 6, tuni ah CDF Thantlang nih SAC ralkap le palek hna sinah sawmnak cathanh an chuah. Cu an cathanh ah cun Nawlngeihnak a latu ralhrangbu kuttang ah a um i mipi hna hrem le thahnak ah hmanmi dirhmun in mipi lei ah a dir i bochan awk a tlakmi dirhmun ah i tthial a duhmi hna cu CDF Thantlang nih lunglawm tein kan in don peng hna.

Cun ralhrangbu doh dingah hriamnam tling he kan sinah tel a duhmi le CDM ah luh a duhmi SAC ralkap le palek hna cu tangka sing 60 kan in pek hna lai.Cu lawng si loin hriamnam he rat a remcang lo zongah nan taklawng in ra ko u, a si khawh chungin nan himnak kongah tuanvo kan in lak hna lai. A caan a tlai hlanah mipi lei ah dir in ralhrang dohnak ah rak i tel cio u tiah kan in sawm hna tiah an tial