Breaking News: Bomb Puah Ruangah Hakha Nazareth Sang inn Tam Ngai Arawk Ralhrangbu Nih Ngaihthiam Hal. NUG nih 2021 nizaan  September 7 zinglei sang i D-Day a thanh hnu suimilaam 9:30PM fai in Hakha khuapi chung ah meithal le bomb thawng theih a si i bomb meithal ruang ah Nazareth chung inn a rawkmi le biakinn an khen mi a um tiah sangmi sin in thawng kan theih. Inn a rawk mi kongkau ah SAC Mithat hna nih September 8 zinglei ah sangchung ah ra i nizaan an khen mi pawl zohfelnak an va ngei.

 

Min langhter duh lo sangmi pakhat nih Tuzing kan sang ah SAC lei tam taktak an vun ra. Inn an khen i a rawk mi an rak zoh. Ngaihthiam hna an hal hna  tiah a chim. Nazareth sang um Mara Biakinn zong hmun tam tuk ah an khen. SAC minung an i chok rih ca ah a rawkmi zohfel nak an va ngei kho rih lo tiah kan theih. Nizaan kahdohnak ruang ah Chin Oo Sii sang um upa pakhat fak ngai in hliam a tuar tiah theih a si. Photo/Nizaan SAC hman mi bomb

Thawngdang Ramchung riantuan a har tuk ruangah Thai ah riantuan mi hna a thli in kawlram lei a kir mi Kawlram mi 50 leng cu Thai border force nih ramri ramtang ah an tlaih hna. Thai ram hi covid ruangah ramri vialte a khar pin ah covid zawtnak a tamnak hmun ah chuah vah zong phih dih a si i, Thai in Kawlram lei ah pungning lo in tlun a timmi hna pin ah Thai in Kawlram lei kir a tim minung 10 leng zong tlaih an si tiah theih a si.

Thailand nih a ramchung state 29 ah lockdown a tuah lio a si i, a bik in mah state chung i ramdang riantuan mi hna cu chuahvah khap an si. Atu an tlaih mi hna minung 51 hna hi Samut Prakan in a ra mi hna an si i ramri khuapi pakhat Maesot peng Phahwa khua pawng ramtangah an tlaih mi a si tiah AAC riantuan pakhat nih a chim. Hi kong he pehtlaihin AAC riantuantu Ko Ye Min nih phungninglo in a lut mi cu an si lo nain an kir lei ah cozah theihpi lo in an kir ruangah an tlaih mi hna an si. an dihlak 51 an si. Ramtangah an i thuh lio ah an tlaih mi hna a si. Pa 34 le nu 17 an si.Tuchun ah Maesot pengah Kawlram leiin a thliin luh a timmi 12 an tlaih than hna.

An dihlak hi upadi ningin dantat an si lai. A tu hrawngah a thliin kir a timmi le a thli in luh a tim mi minung 80 leng an tlaih cang hna tiah a chim. Thai le Malaysia ramri Thai ram thlanglei ah Malaysia lei a thliin kal a tim mi Kawlram mi 10 zong Thai nih Sukhala state Hatyai ah an tlaih than hna tiah theih a si.

Thai nih emergency a thanh chungah riantuan ding an ngeih lo ruangah Thai ah a thliin luh a tim mi le Thai in a thliin tlun a timmi Thai palek nih an tlaih mi hna thong 40 leng an si cang tiah Thai covid dotu phu nih an thanh. Hi chungin ramri ah an tlaih mi hna thong 30 le a cheu, Thai ramchungah tlaih mi thong 10 leng an si i, a tam deuh cu Kawlram mi an si.