Breaking News: Aung La Nsang Ruangah Minung 3 An Thi An Vanchia Kho Taktak

One Championship One Century ah  Aung La Nsang le Brandon Vera cu Light Heavyweight Champion taisawm an i Aung La Nsang nih ateinak a hmuh. Myanmar mi 3 cu Aung La Nsang an ttanh ruangah an thih phah tiang a thawngpang theih a si. October 13 zaan i Aung La N Sang le Brandon Vera an i thonghmi a zohtu hna cu Aung La N Sang an rak ttanh tuk ruangah Myanmar mi U Maung Tin Soe (kum 60), U Hla Win (kum 56) le U Hla Aung (kum 70) pawl hna cu ruah lo pi in an nunnak a liam tiah theih a si.

U Hla Win cu Aung La N Sang a thonghnak a zoh lioah “Aung La nih a tei, Myanmar hokhaw” tiah au pah in a kut a benghnak ah le a laam a hlawhnak ah a hnulei ah ai ngal i a thi tiah an chungkhar a simi mi pakhat nih a chim. A poi ngaingai. Cuve batukin U Maung Tin Soe zong Aung La Nsang cu thazaang pek in “thong hme, thong hme, Aung La thong hme” ati i kut beng pah i a au cuahmah lio ah a a tthutnak in a hnulei ah a ngal i Ukkan khuapi siizung ah an kapi nain siizung ah a nunnak liam tiah an chungkhar sin in thawngpang kan theih.

Cun U Hla Aung hi a lung ttha lomi (lungfah zawtnak a ngeimi) a si. Aung La N Sang a thonghnak puai cu an midang inn ah a zoh i Aung La nih teinak a co a hun hmuh bakah khan “hi bakhi a si Myanmar min thattertu” tiah a au ve len i cu hnuah a lungfahnak (lungzawtnak) a chuak i a thi tiah palik sinin theih a si. Aung La N Sang attanhtuk ruangah thihnak atongtu U Hla Aung cu Irrawaddy ramthen Didaye (ေဒးဒရဲ) peng Hmawbi khua uksuh Tha-nih-pat khua ah a ummi a si.

U Maung Tin Soe cu Yangon ramthen Taih-gyi peng Pukkan khuapi Anawyathar veng Oo-pho-dan  ah ummi a si i U Hla Win cu Yangon ramthen Taih-gyi peng Pukkan khuapi Shan-suh khua ah a ummi a si ve. Aung La N Sang ttanhtuk ruangah 2017 June 30 zaan zongah Yangon khuapi Yankin khua ah ummi  kum 65 putar pakhat cu a rak thi bal cang i, 2018 June 29 zaan tthiamtthiam ah Ngapuhtawng peng Pinkhazaing khua iU Pho Thar Aung @ U Htay Win (kum 61) zong a rak thi tiah theih a si. Ref : TV, IWD, Chindwinpostmedia