Khah atu hi timit leiah chinland ralkap le Sac ralhrang pawl an i kap cuahmah lio i tihphang ngaingai asi. Fak ngaiin bom le meithal thawng theih asi atur bak in an tur cang. Asi khawh ah cun aho hmanh rak chuak hlah ulaw rak i ralring ko ulaw! Mah thawngpang hi atu bak khan athang mi asi.

Thawngdang Chin ramkulh, Matupi peng, ni chuahlei Zotung hmunhma, Chin-Magway ramri ah SAC ralkap pawl June thla in an lut i hmun hma zohfelnak an ngeih caah khuami thong tampi ramlak ah an zaam i sii le eidin bawmhnak an herh tiah Zotung ralzaam bawmtu phu rian ngeitu nih Khonumthung Burmese ah a chim.

“Kanmah ni chuahlei Zotung lei ah June thla zarhkhatnak in SAC ralkap pawl voihnih an lut i mipi tam deuh ramlak ah zaam a si. Ralzaam hna nih an herh bikmi cu eidin a si. An ngeih chun tein khua pawngkam ah cycle in siseh, ke in siseh an kal khawhnak ah bawmhnak an hal i an i khawn, sii hi a har ngaingai. Fur caan a si caah an zaw, raifanh an ngah caah an ngandamnak a zual ngai”.

SAC ralkap pawl cu Gangaw in Matupi lei ah a luancia June le July thla chungah an kal i kahdohnak a um lo nain SAC ralkap nih hriamngan/hme an kah thlorh i Ramsi, Nawbung khuachung an luh caah khuami hna nih innlo an zaamtak. SAC ralkap pawl an rat ruangah Gangaw in meng 2 aa hlatnak ah a ummi Antha- Zawngnak- Darcung- Ramsi- Nawbung tiah khuate 5 in khuami 2,000 leng ramlak le Gangaw lei ah an zaam tiah theih a si.

Chin-Magway ramri, Matupi, Zotung peng Ramsi khua lei ah a kalmi SAC ralkap pawl cu July thladongh hrawngah Ramsi khuami 30 hrawng an tlaih hna i khuami hna khamh ding ah a kalmi CDF-Zotung Commander in Chief le adang hriamtlai 2 cu SAC ralkap nih an rak thah hna.

Atu lioah SAC ralkap pawl cu Ramsi khua chungah hmunhma an khuar rih ko tiah theih a si.
Matupi peng ni chuahlei Zotung hmunhma hi umkalnak a har i bawmtu pawl an kal khawh lo caah ralzaam hna eidin le sii bawmh khawh an si rih lo tiah theih a si. Credit: The Chinland Post