ASEAN Special Envoy Prak Sakhonn Myanmar Ah Tlawng Nain Suu Kyi Tonnak Nawl An Pe Lo! ASEAN Special Envoy le Cambodia foreign minister a si mi Prak Sokhonn cu June 29 ah Myanmar a tlawng. Prak Sokhonn hi tutan he cun Myanmar ramchung ah a voihnihnak a tlawn nak a si i, Myanmar ah ni 5 chung a caam lai tiah Cambodia ministry of foreign affairs zung nih an langhter.

SAC nih taza an cuaimi, biaceihzung ah an chuahpimi hna le dantatnak pek a tongmi hna cu tonnak nawl pek a si lai lo caah Aung San Suu Kyi cu a tong kho lai lo. Prak Sokhonn nih tutan a tlawn chung ah ASEAN nih zulhphung an ngeihmi 5 kong le minung le minung i zawnruah nak le bawmhchannak kong cu a ceihpi hna lai tiah theih a si. Aung San Suu Kyi cu Naypyidaw thonginn ah chia loin a hlan i an chiahnak inn chung ah chia ṭhan ding in ASEAN palai Prak Sakhonn nih SAC lutlai hna cu June 27 ah khan a rak nawl cang hna.

Ramkhel Ruangah Tlaihmi Hna Thlah Dingin Le Tuahsernak Ṭha Lo Ngol Dingin G-7 Hruaitu Nih SAC Nawl!: Myanmar ram ah hramhram tuahsernak ṭha lo ngol ding in le ramkhel ruangah tlaihmi dihlak thlah ding in SAC cu G-7 nih an nawl i, democracy phungning tein a kal ṭhan khawh an duhnak kong an langhter. Mizapi cozah cu hrawk in, Aung San Suu Kyi le ramkhel hruaitu hna cu tlaih an tong i, tlaih a tongmi dihlak cu thlah ding in vawlei cung ramdang hna nih nawlnak an tuah len nain Aung San Suu Kyi cu naite ah khan Naypyidaw thonginn thar ah ṭhial a si.

UN, US le ASEAN Special Envoy hna cu Aung San Suu Kyi thongthlak a tonnak kong ah an thin a phang i, France zong nih ramkhel ruangah tlaihmi dihlak cu thlah dingin a nawl ve. Myanmar ramchung ah ramkhel sining aa thlen hnuin ngakchia 100 leng telh in minung 2100 tluk nunnak a liam pinah minung 14,000 tluk tlaih an tong cang. UN, US le Europe hna bawmhnak in ASEAN nih Myanmar buainak cu daihter ding in aa zuam ve len nain atu tiang ah an hlawhtling kho rih lo.