Bochanmi Salai Ceu Bik Thawng Zong Aisum Kho Ti Ve Lo A Holh Ve Cang A Chimmi Cu Ahman Kho Taktak Hi Ding Bak Hi Asi

RALKAP hi riit-ttih ah thlai peng ti hlah usih! (Kawlrawn caah NLD–Tlangmi caah Miphun Party).Tuluk cozah nih Hong Kong ramthen mipi pawl anmah tein cozah isernak nawl (Chief Executive thimnak nawl) a pe duh hna lo i Hong Kong mipi nuai 2 nawn nih duhlonak an langhter, an buai cuahmah ko atu hi. Kan ram zongah Nay Pyi Taw cozah nih ramtthen pawl mahte cozah sernak nawl a kan pe duh lo I kan buai cuahmah ve.

Cucaah Phunghrampi article 261 cu remh ko uh kan ti peng hna caah ralkap le USDP nihcun an cohlan cang nain NLD nih atu tiang a duh rih lo. Kan remh ahcun ramtthen(states) ah ralkap an nawlngeihnak a saang lai an ti. An kan tthihpheih. Hihi ramtthen tlangcung mipi seihchiah lo le zeirello a si. Mipi nih 75% thimnak nawl kan nei i cu a tamdeuh nih cozah an ser ko lai cu ta.

Kum 2015 thimnak lio zongah tlangcung party nan pek hna ahcun ralkap le USDP cozah an kai lai tiah–hehchat tiin mipi an tthihpheih hna. A taktak ahcun Kawlrawn ah NLD nih tei sehlaw (a tei peng ko rih lai i), tlang ah miphun party nih tei cio ko usih law USDP le ralkap cu khoika awngkua in dah an rak luh lai I cozah cu an rak ser lai? A taktak ahcun NLD nihhin lungput pipuam nei sehlaw — khah, kanmah le kanmah kan icuh le kan i entai ahcun a karlak ah vei pawl awngkua in an rak lut sual lai caah nannih tlangcung ah tuanvo la uh, kannih nih rawn hi tuanvo ka lak ve lai i kan itthuan te lai ti hna sehlaw— anmah zong Central cozah an tlai hnga i miphun party pawl zong ramthen kip ah cozah kan tlai ve hnga i cunak fawi, tha le dawh um ti lo.

Hell ram tthihpheih in thlarau tlau tlaih timh hi cu a auh tuk cang. Pathian dawtnak le vanram kong cawnpiaknak in thlarautlau tlaih kha a tha deuh suaimau. Ralkap rit-ttih-thlai ramkhel tuah le vote lak timh hi cu kaltak cang usih, a niam tuk i mipi an sung tuk.

Kan duhmi Pinlung federal kong zong an kan chimrelpiak duh fawn lo. Mizoram bantuk mah holh in cacawnnak zong a kan pe duh lo. Miphun dang nih kan ramri an kan enmi zong an mit an kan chinh hnawh. Kan biakinn vialte zong laisen a kan pe lo. Mipi phaisa budget vialte an suaksam dih, an zal ah an i senh. Parliament zongah upadi zong an suai/remh lo. An hmur an ttem hna.

Cu pawl cu kan van mawhchiat dikdek ah RALKAP uknak kha maw nan duh deuh ne a kan ti. Kanmah um hlah usih law ralkap dawh an ra lai hih tiah a kan tthihpheih. A taktak ahcun ralkap cozah sahngar hran in an hran lioah raltha tein a rak doh ve ciomi kan si. NLD nih rawn ah Kawl vote in teinak co ko sehlaw tlangcung ah Miphun Party pawl nih tei ve ko cang usih. Miphun mei luah le thlawhsial ve zong a hau ve cang. Hnu kan fual tuk cang.Credit: Salai Ceu BiK Thawng