Zeidang hlan ah Kawlram ramkhel kongah basics taktak asimi; 2008 Phunghram, Panglong Conference hnephnop le Panglong Agreement, le Tlangcungmi Revolution (dohthlennak) hna pawl rel ta loin online in ramkhel kong hei el len khi thlingza ngai asi. Bible rel huahualo in Bible kong el a huam ngaimi bantuk khi ka tahchunh! An mawh lo, nan mawh hrimhrimlo.

DVB, Irrawaddy le Kawl Media pawl facebook i news nan relnak menmen in cun NLD Politics lawng nan hmuh khawh lai. Nan mawh hrimhrimlo! Minung phung asi ko. Tutan ah Tlangcungmi an lung a fimtuk cang. Kachin, Shan, Rakhine, Karen le Karenni Tlangcungmi Parties pawl an thawng lai. Kanmah zong zeitlukin miphun cungah kan ihngat 2020 Election ah a lang ve lai. Ram Tinthei

Thawngpang dang rak rel chih:Democracy tling taktak muru pathum (By:Rolain). Democracy taktak a muru hi zei dah a si hnga tihi ka tuak len ve. Aphi hmuh ka harh ngaingai nain keimah pumpak nih te zei bantuk Democracy dah ka duh tiin biahalnak ka tuah hnu ceu ah a phi 3 ka hmuh. Vawlei cung ram ah Democracy ram tiah ruah mi ram poh hi ram dai an si thlu lo.

Tahchunnak ah Israel te hna cun Atu hi US pi hmanh a buai peng. US ram hna hoi ahcun ralhrang le ralkap nak in mipi tih an nung deuh a ruang cu zalong tein hriamnam an i tlaih khawh caah mu. Chim duh mi cu Daihnak, te hna, thanchonak te hna, fimcawnnak, chawlehthalnak te hna hi cu Democracy muru si lo in Democracy theitlai tu an si deuh. Democracy muru hi phunthum in ka then. Cucu Zalonnak, Nawl ngaihnak le Biachahnak nawl ngaih tiin ka then.

Zalonnak: Minung zalonnak le duhthimnak hi a sang tuk mi a si caah Pathian hmanh nih a buar lo mi zalonnak a si. cucaah duh thimnak aa kan peknak a si. Pathian nih keimah ka zum seh tiah hramhram in kan zalonnak buar in aa kan zumhter bal lo. chim duh micu minung zalonnak hi a sang tuk mi a si caah minung nunnak sertu le a ngeitu pathian hmanh nih a buar lo mi a si.

Cucaah Democracy ahcun zalonak hi a biapituk mi a si. Zalonak taktak a um lonak ahcun minung sining aa thup, minung sining aa thup ahcun minung caah a herh mi hngalh piak khawh le riantuan piak khawh a si lo, cu tik ah thanchonak riantuan khawh a fawi lo.

Nawl Ngeihnak: Kawlram ramkheel le cozah si ning cu kan fiang dih ko lai ka zumh. Cozah rian tuan tik ah maw phu pakhatkhat chung riantuan tik ah rian le dirhmun lawng aa kan pek i nawlngeihnak (power) aa tel chih lo. Hihi Demcoracy zalonnak a buartu a si.

Mi pakhat cu rian le dirhmun kan pek tik ah a rian le a dirhmun cung ah nawl ngeihnak (power) pek chih phung a si. rian le dirhmun lawng pek i nawlngeihnak pehcih lo cu nehsawh /zeirel lo pakhat bak a si.

Rian/dirhmun i pek ah hin nawlngeihnak pek chih phung a si. rian le dirhmun pek i nawl ngeihnak pek lo cu, duum hau ca hmun hma pek i zei thlai hmanh a chung ah cing hlah ti he aa lo. cu bantuk nawlpek cu Democracy a buartu a si.

Kan ram ramkheel tuak hmanh uh, Democracy zauk phung bantuk in thimnak tuah a si, teitu party nih cozah a tlaih ko nain nawl ngeihnak a pek chih lo mi hi Democracy a buartu cu a si ko. Cozah tlaihnak hmunhma le rian vial pek tung i nawl ngeihnak pek lo, President umter ve tung i nawl ngeihnak pek lo cu Democracy a buartu taktak an si ko. cucaah nawl ngeihnak hi Democracy a muru a si tiah ka ruahnak a si. Kan miphun le kan ram, kan nunphung le zeizong te kongah nawl ngeihnak sang kan ngeih hrimhrim a herh.

Biachahnak nawl: Mi pakhat nih a ruah mi le akhan mi kong ah biachahnak nawl aa tuah khawh ding a si. a biachahnak cu a palh pek palh lo pek ah biachahnak cu aa tuah hrimhrim ding a si. Kan miphun le ram caah a tha tiah ruah mi cung ah zulh ding in biachahnak nawl hi a ho kut cung hmanh ah a um ding a si lo, kanmah pumpak le miphun kut cung bak um a um ding a si. cucu Democracy muru pakhat a si.

Biachahnak nawl a um lo ahcun minung zalonnak le nuhrin covo buar a um ti nak a si. Zei he dah ka tahchun hnga ti ahcun, “Ralkap chan lio ah cun ralkap khua an tlun caan i harnak an ton ahcun khuami aa kan pumh aa kan vuak, kan lungre cu a thei i kan ngaih a rak chia ko nain tah a rak kan sianh lo, lungretheihnak le ngaihchiatnak cu tahnak nih a zulh mi a si, kan ngaihchiat ahcun kan tap lai ta, lungretheih le ngaihchiat tiang cu aa kan tuar ter ko nain kan ngaihchiatnak langhtertu tahnak cu a rak kan kham, tap hlah u an kan ti ahcun kan tap ngam lo.

Chim duh mi cu, Democracy muru hna hi buar ahcun zeidang ah i ruahchan ding an um lo. Thanchonak, daihnak te hna zong a um ve lo. acung lei pathum, Zalonnak, nawlngeihnak le kan nawl ngeih mi cung ah biachahnak kan tuah khawh lo ahcun ramchung ah buainak a um. Buainak a um tik ah ramchung thanchonak riantuan khawh a fawi ti lo. cucaah Zalonank, Nawl ngeihnak le Biachah khawhnak nawl hna hi Democracy muru taktak cu cu an si.