Chin Association of Maryland(CAM) ah Director a ṭuanmi Pu Zo Tum Hmung nih Donald Trump le a dirkamh tu pawl nih US Capitol Building an baohmi, buainak le thisen luannak tiang an tuahmi kongah fak ngaiin a soisel ve. Asinain “Hi cawlcanghnak hi zohchia tuk hringhran a si ko nain kum zabu tampi a kal cang mi US Democracy hmailei dirhmun cu a hnorsuang lai lo, Democracy ram pical an sinak limhang cu a zor ter lai lo” tiah a chim.

Hi bia hi VOA nih interview an tuahnak ah Pu Zo Tum Hmung nih a chimmi asi. “Sandah piah, duh lonak langhter timi cu mizei paoh nih zalong tein tuah khawhmi a si ko. Asinain Hluttaw Innpi chung tiang luh i Capitol Building tiang hrawh, den chih timi hi cu a zoh a chia ngaingai.

“Keimah zong ka lung a ṭha lo ngai. President Donald Trump pumpak hrimhrim nih Capitol Building an luh hlan ah sandah piahtu, a dirkamhtu mibu pawl thazaang peknak bia a chimh hna. Sandah piahtu mibu sinah President pakhat nih thazaang peknak bia a chim hi a ṭha lo taktakmi asi. Asinain hibantuk buainak ruangah USA Democracy limhang cu a zor ter hrimhrim lai lo tiah ka zumh.

“America ram cu kum tamtuk Democracy phung in aa hruai cangmi an si. Cucaah hi buainak ruangah an limhang a zor lai lo, hmailei Democracy uknak in an karhlan nak ah limhang zor tertu a si lai lo. Keimah pumpak zong nih biatak tein buainak a tuahtu, buainak a chuahpi tu hi ka mawhchiat ngai ve hna. Cucaah tubantukin buainak a chuah tertu, buainak a tuahtu le Capitol building tiang a baoh i a dengtu hna cu Upadi ning tein dantatnak an pek hna awk a si ko. An pek hrimhrim ko hna lai” tiah Pu Zo Tum Hmung nih a chim hi asi.

USA thilcang, Capitol Building buainak kong ah V.O.A nih Kawlrammi chung in bochanmi ramkhel thiamsang timi hna cu biahalnak an tuah hna i cu ahcun Pu Zo Tum Hmung zong hi Kawlram miphun chung in ramkhel thiamsang a si caah an hal vemi asi. Pu Zo Tum Hmung cu Chin Association of Maryland(CAM) ah Director a ṭuan liomi asi. Source: V.O.M

____

Copyright © Chin World News Evening