Tukum US rampi thimnak cu atu tiang tlamtling tein zeihmanh an tuah kho rih loh. Atu tiang rih ahcun, Democratics party candidate leiin Joe Biden nih a tei rih. Media tampi le mipi tam deuh lungthin ah cun Joe Biden nih a tei cang. Amah hi US President a si tiah aho paoh nih chim cio a si.

Asinain, Trump nih vote an fir. Thil dik lo tampi a um tiin Biaceihzung tiang a phakpi i kanmah nih kan tei ko lai tiah a chim pah lengmang. Keimah nih ka tei ko lai tiah a chimmi kongah Joe Biden a lung si lo ngai. Trump cu a hun leh colh ve.

Joe Biden nih a chimmi cu,“Trump nih a sunghmi a cohlan duh lomi cu ningzak taktak a si. Zeiruangah dah hitihin ka chim khawh ti a si ahcun, hibantukin a cawlcangh lengmang ruangah a dirhmun a thleng hlei lo, amah ning si ko lai. Caan a hung liam thluahmah lai i January ni 20 ni ahcun a takin kan hmuh ko lai.

“Fiang tein ka chim a si ahcun, vote relnak kongah zeihmanh adik lomi a um lo. Thimnak cu thil sining tein, dik tein a kalpi a si ko. Teinak kan hmuhmi an lungtlinlo ruangah a si i kar kan hlannak ah biahmaihnak kan ngeimi le kan chimphuanmi cu zeihmanh a kan down lo. Cu lawng si loin, American mipi zong nih thil sining fiang tein an theih ko,”tiah a chim. Chirhchan: BBC,Guardian

US thimnak kong thawngpang dang rak rel chih: Senate Democrat: “Zapi Theih in Biden hi kan Lomhpi Ngam kan si lo caah, Biden kan Lomhpinak vun kan Chimpiak ko ne,” tiin Republican Riantuanhawi nih an ka Cah. Republican lei in kan riantuanhawi hna nih Biden hi zapi theihin an lomhpi ngam ve lo caah lomhpinak bia chimpiak dingin an ka fial, tiah Delaware Democratic Sen. Chris Coons nih Tuesday ah a chim.

A term 2nak kai thimnak Democrats lei nih an ka firpiak, tiin hrih le hram thitha um lo piin Trump nih tazacuainak biataktein a kalpi cang caah, GOP lei nih zapi theih in Biden an lomhpinak an langhter ngam ti lo. Republicans chungin senior tampi nih Trump an dirkamh i, Senate Majority Leader Mitch McConnell le bang nih cun Trump nih tazacuainak nawl ai ngeih, tiin a chim. Cun South Carolina Sen. Lindsey Graham zong nih a sunghkhaan lo dingin Trump cu a forh.

“A tu cu a caan zong a rauh ngai cang ko caah, Republican hruaitu pawl hi ralthatein dir cang hna seh law, election a phichuak cohlan din an si cang,” tiin CNN’s Alisyn Camerota sin ah Coons nih a chim.

“An min cu ka chim lai lo. Republican pawl nih President-elect Biden cungah conglomhnak bia chimchin dingin phone in an ka chonh. Cucaah, kei ka rian cu, pumpaaktein a tu bantukin thildik tuah an pekzulh khawh nakhnga forhfial hi a si. Cun, President Trump zong nih thilsining tak hi a cohlan zia a thiam ve cang nakhnga le, zapitheih tein raltha tein a cohlan zia an thiam nakhnga thazaang pek hi ka rian a si. Zeicahtiah, president rian i apnak hi tuan ah tuah lo ah cun thil buai ding a tam chinchin ding khi a fiang ko. Ai thok ding hmanh khi a si cang,” tiin Coons nih a chim.

Trump nih sunghkhaan a duh rih lo caah, President rian i apnak Biden le a team nih an thok khawhnak dingah a herhmi nawlpeknak capar cungah General Services Administration administrator Emily W. Murphy nih a min a thu rih lo. Biden rianapnak tuanvo a latu officials pawl nih GSA hi hranhram in mithutternak nawl an i ngeih ve fawn lo. Asinain, a dang karhlannak tampi kan i ngeih ko rih, tiin Biden officials pawl nih Monday ah khan thawnglatu sinah an chim.

“Election phichuak official tein namhneh dingah Biden officials pawl nih Myrphy hi baiceihzung ah taza cuakhawhnak lam an ngei maw?” tiin CNN Camerota nih Coons cu a hal. “President rian i apnak kongah biachimnak nawl ka ngei lo. Asinain, cucu GSA administrator caah siseh, Biden transition team caah siseh, thil dik a si ko,” tiin Coons nih a leh.

“Rian i apnak kalpi pehzulh le rianapnak tuanvo a latu team pawl nih an tuah dingmi vialte pehzulh in an tuah i, thilsining cohlan zia thiam dingin vun hneek hna hi a biapituk mi a si. Rianap kongah thil biapi, thil harsa le cop le cilh in tuah dingmi rian tampi a um. Transition team pawl hi policy plans kongah siseh, rian ca i nominees asiloah candidate pawl interview tuah kongah an buai ngai cang. Cu bantuk an rian fawizaang deuh in a tuanter kho tu federal lei bomhnak hi an herhtuk cang,” tiin Coons nih a chim. Source: Rawn Chin (Global Rawn Chin Media)