President-elect Joseph R. Biden Jr. nih November ni 26, America ram i Thankgiving day an hmannak biacchimnak a ngei i, America ram mipi sinah biachimnak tawi a ngei “Hi ram nih hin a dir ka in nihinni tiangah harsatnak tampi a ton i, a doh. Sinain lungrualnak in kan harsatnak kan hloh dih tawn. Atu zongah pulrai he kan i doh lio a si fawn. Kan tuartuk cang. Hi pulrai (virus) he aa domi kan si i, kanmah le kanmah hi a do ding kan si ti lo,” ti hi nan theih hau.

Conoravirus ruangah America ramah minung 260,000 nunnak a liam cang i, tutan ah chungkhar hmunkhat ah nuamhnak caan hman lio ah nunnak a liammi hna chungkhar caah cun ngaihchiatnak in an khat lai. Ngaihchia mi hna chungkhar kan tuarpi tuk hna. Ka fapa hi kum 2015 ah ka rak sung ve cang. Cucaah America ram nih hi pulrai kan dohnak ahhin sungh ding cu a si kho lo. Hi pulrai ahhin kan tlawm (surrender) hrim a si lo. I huatnak-nakin dawtnak kan ruah deuh i, i tthennak karhter tu nak cun lungrualnak tu in teinak kan hmuh deuh lai,” tiah a chim.

Tutan ah Biden hi US president a si cang timi hmuh khawh a si. A ruang cu “bia a chim lio hmanthlak khi zoh ulaw America ram puanzar pahnih (Flag) pahnih um lai. Cu pin ah US cozah chinchiahnak an hman mi Mupi (Eagle) a cuang. Hi nih a langhtermi cu Joseph R. Biden Jr. hi The General Services Administration (GSA) nih President-elect hi a cohlan cang i, nawlngaihnak le phaisa hmannak an pek diam cang,” ti nak a si.

Cucaah Biden hi US president a si ko cang timi hi a fiang cang ko, mah belte Trump lei nih vote thlaknak kongah lih le hrawkhrawl a tamtuk tiin, vote thlakmi zohtthannak an nawlmi zongah tam deuh cu Biden teinak an pek tthiamtthiam. Cucaah 2021 US president cu Biden a si ko timi a fiang cang ko.