Pu Trump ttanhtu pawl hnemhnak le fimchimhnak: Pu Trump a sungh ruangah le thil ttha lo, Capitol innpi I a tuah ruangah miphun dang si hna seh, Laimi (Chinmi) si hna seh tampi nih an kaltak cang. Hi hnulei zongah an kaltak len rih lai. A party upa cheukhat zongnih an rem ti lo. A fale, a chungkhar ca zongah zeitluk ningzak dah a si mu. A sungh ruangah a minung pawl cu tuan tein thil ttha lo tuah ding in a rak forh cang hna I mah cu a hlawhtling. Asinan atutiang keimah sual le palh a si a ti lo. Democratic party pawl nih a rangnak in President ttuan ti lo ding in an I zuam lio a si. An hlawhtling lai maw tling lai lo cu kan cuanh hna lai cu.

Atu lio cu, Trump a sungh ruangah amah a ttanhtu pawl nan lung a rawk tuk, nan thin lawng a har, nan I hngilh kho ve lo I nan ing lawng a puang I Biden a ttanhtu pawl cu nan kan huat chinchin ve. Mah bantuk lioah Biden a ttanhtu pawl zong nih cattial lo ding le dai tein um ding kan si ko nan keicu ka rak peh lengmang ko hi. Nan lung fak chinchin seh tiah ka ttialmi a si lo. Trump zong siseh, a ttanhtu pawl, Laipawl zong nan sungh ruangah kan tuarpi ve hna. Keicu tuan pi tein ka rak chim ciabang, Laimi (Chin miphun) le Chinram a lamkip in kan tthangcho khawhnak dingah Profet bantuk in Facebook chungah dinnak, biadik biahman, le cawnpiaknak hman cu ka aupi ve lai tiah ka rak ttial cang kha aw.

Miphun khat u le nau kan si hna I Trump le Biden ttanh ruangah kan I huat ding a silo I kan I ral ding zong a si fawn lo. Pakhat le pakhat kan ttanhnak a ruang te kha kan I chim hna lai I kan I ruah ko hna lai. Pakhat le pakhat nem tein kan palhnak kan I remh hna lai I cu ti cun kan dihter awk a si ko. Kan Pupu Biden cu atu thla ni 20 ah US president rian a luhnak lawmhpi a si cang lai I a rian cu a thok cang lai. Mah in cun atu thimnak kong cu a lim cang ko lai. Kan dai dih cang ko hna lai. Atu liote hi a caan a si ruangah keizong nichiar tein ka van ttialnak a si.

Pu Trump a ttanhtu, mi tampi nih ttial ti hlah nan ka ti lengmang. Na cattial hi mi na ti hnawhtuk nan ka ti. Mi ti hnawh ka tim bel lo. Ca ka ttial ruangah fangkhat hmanh phaisa ka ngah lo. A tak te cun, thuk deuh le kau deuh in khuaruat kho ve hna seh law thil tampi thei ve hna seh ti kan duhpiak ruang hna ah ka rak ttial lengmangnak a si. A ka vawlpammi pawl zong kan ngaihthiam ko hna. Thla zong kan campiak ko hna. A cheu cu ka facebook timeline I khawhmenh (comment) nan pekmi zong kan hlonh piak hna ruangah nan cungah ka thin a har hlei lo.

Messenger in ca a ka kuami cheukhat zong kan phihpiak hna ruangah kan hua hna lo, ka thin a har fawn lo. Thinhar le mihuat cu sual a si. Khrihfa sining he zong a tlak lo. Ka cattialmi tangah “thih ding” ti bantuk in khawmenh a pemi pa zong na konglam ka theih I zei Khrihfa buu ahdah member na si zong kan theih ko. Na Khrihfa bu le na pastor nih an in piangthar ter kho rua lo. Na cahrang ah thla kan campiak ko. A rauh hlanah na piangthar ko lai.

Pu Trump le a chungkhar hi ka hua hna lo keimah pumpak in. Trump zong a rum ning le a inn le lo pawl an tthatnak kong video documentary zong a luancia kum 5 hrawngah ka facebook ah ka rak post bel cang. A fanu, Ivanka Trump le bang cu ka uar bak. A video zong ka facebook ah ka rak post bel cang. A dawh ning, a fel ning ka rak ti. Asinan Laimi (Chinmi) tampi nih nan I thawh I Trump cu Pathian thimmi, hmanmi, a umpi mi le Khrihfa ttha a si, ti bantuk in nan chim I nan ruahmi hi 100 ah 100 ka pom lo. A palh tukmi ruahnak a si ka ti.

Mah nan ruahnak hi nan palh, a hman lomi a si ka ti ruangah ka rak ttial lengmang nak a si. Trump cu Pathian nih a thim a hman nan timi nih a sawhmi cu Pathian kha duh poah in tuah nan timh I Pathian kha hngakchia le zei thei lo bantuk men in nan ruah cu. Pathian zei I nan rel lo zong a si fawn. Pathian cu nan kutchung ah hum nan timh. Pathian nih Trump bantuk thinlung put le ziaza a neimi a hmang bal hna lo. A thil tuahmi le a nun ziaza le a biachim le a lungput in nan theih ko lai. Mah ruangah Trump ttanh le dirpi cu pialsual/kalsual phunkhat a si ve ka tinak a si. Trump bantuk Pathian nan thimter I nan hmanter mi cu sual ngaingai a si ve.

Ka cawnmi le ka theihmi, le ka thiammi pawl hi ka miphun hawi caah tthahnem santlai si ve seh tiah nan zawn ka ruah ruangah ka van ttial lengmang nak a si. Kan ti hnawh hna lo I kan ti hram fawn hna lo. A caan ahcun ka bia a fak ngai ve ko lai. Mah zongcu kan dawt hna ruangah a si ko. Nan lungfim deuh seh ti ka duh ruangah a si ko. Kau deuh le thuk deuh in thei ve hna seh ka ti ruangah a si ko. Nu le pa nih fa le cu nem tein nun kan chimh hna I an ngai lo ahcun fungfek in kan tuk tawn hna.

Mah cu nu le pa nih an fa le an huat hna ruangah a si lo. An dawttuk hna ruangah a siko. Keizong kan dawt tuk hna ruangah a caan ahcun ka bia kha a fak ngaimi a lo ve ko lai. Miphun dang bantuk in fim ve hna seh, fel ve hna seh, ruahnak kau deuh nei hna seh, thluachuah hmu hna seh, thangcho hna seh, nunzia dawh nei hna seh, Pathian tehte ttha si hna seh, piangthar hna seh, nan lamtluang seh, fimcawnnak upat zia thiam hna seh, ninghngal hna hlah seh, a thin saumi si hna seh, dawtnak le ngaihthiamnak nei hna seh, dinnak, daihnak le remnak duh hna seh/nei hna seh ti pawl kan duhpiak hna ruangah ka rak ttial lengmangnak a si.

Pu Trump ttanhtu ka miphun hawi hna, nanmah tihram le cattial hnawh hi ka timhmi a si lo. Tihram le ttialhnawh in duh hna ning law, a lam tampi ka theih ve ko/ka thiam ve ko. Tahchunhnak pakhat in ka van chim lai. Laimi (Chinmi) chung in 100 ah 90 hrawng nih heh tiah Pu Trump caah thla nan campiak, thimtthan a sinak ding caah, pastor le evangelist le vawlei lei hruaitu telh in. A phunphun in biaphuan le cattialmi zong nan nei fawn. Laimi 100 chungah 10 hrawng lawng, mi tlawmte nih Biden caah hehtiah thla kan cam ve.

Asinan mitlawm te thlacamnak cu Pathian nih hlawh a tlingter kan ti lai cu. Mah kong ka ruah ahhin ka lungah a hung chuakmi cu Biakam hlun chung I Profet Elijah le Baal profet, za li le sawm nga thlacamnak kong kha a si (1 Siangpahrang 18:20-40 hi rel te uh). Elijah pakhat I thlacamnak cu Pathian nih a ngaih I a leh. Asinan Baal profet 450 I thlacamnak cu pakpalawng men a si ko. Trump caah thlacamnak zong pakpalawng men bantuk a si ve ko ti khawh a si I mi tlawmte nih Biden ca I thla kan campiaknak cu Pathian nih a kan ngaihpiak ti khawh a si. Nan mah ti cun kan ti hram hna lai lo. Tihram tlak zong nan si fawn lo. Ka tinhmi zong a si fawn lo.

Pu Trump cu a party upa pawl nih an duh tilo, mi rum, mifim le minta mintami le hlasak thiam, university minthang, thilser a thiammi, biaknak lei upa vialte, social media tampi (Big tech) pawl zong nih an kaltak dih cang/an ttanh ti lo/an dirpi ti lo. Trump a umhar tuk cang lai. Laimi (Chinmi) tampi zong nih hi hnu thla tlawmpal ahcun nan kaltak dih ve cang lai ka zumh. Nan kaltak ahcun thilhman le cawnpiaknak hman nan I thim tinak a si ko lai. Nan piangthar (hrintthan) tinak a si ko lai. Trump ttanh ruang I a lungfak mi pawl Pathian nih in hnem ko hna seh! Cattialtu: Van Tum