The Chinland Post: Vawlei ah ke in a kalmi ralkap pawl hmang in kahdohnak a tuahmi a tlamtling lo caah ralkap nih vanlawng bochannak in kahdohnak a tuah mi pawl kha hmuh khawh a si chin thluahmah. Falam le Mindat peng kahdohnak hna zongah vanlawng pawl hmang kahdohnak a rak tuah.

“Ral veve kan si ko nain pehtlaihnak kan tuah lengmang. Atu lio hrawng hi vanlawng in kan in kah hna lai tiah an kan tlerh lengmang” tiah CDF-Matupi ralkap nih Zalen ah a chim. A hlan Matupi peng zongah vanlawng in zohfelnak tuah le ralkap mawṭaw pawl an himnak zong a lakpiak hna tiah a chim.

Thawngpang dang: Myaing PDF nih SAC ralkap pawl nihnih chung bom an puah hnawh hna i 8 an thi. Cuka hmunhma ah kuan, bom le raltuknak thilri pawl kan lak khawh tiah Myaing PDF nih August 16 ah a thanh. Myaing peng, Tengyi khuate le Tat khuate karlak ah August 15-16 tiang Myaing PDF nih SAC ralkap pawl bom an puah hnawh hna.

August 15 ah eidin a rak puttu ralkap mawṭaw 2 cu bomrap an puah hnawh hna i SAC ralkap 1 a thi 3 an i hliam, cun a bawkmi SAC ralkap pawl an lau tuk i thingkung tang an i thuh lioah bom an puah hnawh ṭhan hna i SAC ralkap 3 an thi, 1 aa hliam tiah an thanh. August 16 zongah August 15 kahdohnak hmunhma ah hmunhma a lami SAC ralkap pawl cu bomrap an puah hnawh ṭhan hna i SAC ralkap 3 an thi, 2 an i hliam tiah a thanh.

Cuka hmunhma kahdohnak i a thimi SAC ralkap ruak char ding in a raami SAC ralkap pawl cu August 17 ah bom an puah hnawh ṭhan hna i SAC ralkap nih a pawngkam ummi dawr zuartu 2 an thah hna tiah Myaing PDF nih a thanh. Cucaah mipi hna nih SAC ralkap an umnak he hlatpi ah um ding in Myaing PDF nih a thanh.