Biakinn Ah Fialchom Le Kaapahle In Chim

Hmuhning

𝐁𝐢𝐚𝐤𝐢𝐧𝐧 𝐀𝐡 𝐅𝐢𝐚𝐥𝐜𝐡𝐨𝐦 𝐥𝐞 𝐊𝐚𝐚𝐩𝐚𝐡𝐥𝐞 𝐈𝐧 𝐂𝐡𝐢𝐦. ‘Na kam i a ṭhumi kha na hmaipanh tuk vun ti,’ tiah an kan fial. Laitlang kan um liote in Laimi hi hmaipanh phun kan rak si theng lo. Na ka zumh lo le Laitlang i na hmanthlak pawl kha zoh hna law, hmai a panhmi nakin panh lomi mithmai na hmuh a tam deuh lai. Laitlang bantuk kha kan si rih ko, ramṭha zong ah hmaipanhmi Laimi hmuh awk an tampi lo.

𝙆𝙖𝙖𝙥𝙖𝙝𝙡𝙚 𝙡𝙚 𝙆𝙝𝙧𝙞𝙝𝙛𝙖 𝙉𝙪𝙣. An kan fialmi nawl zulh cu hau kaw, kan kam i a ṭhumi cu, ‘Na hmai a panh tuk,’ tiah kaapahle in khin hun i ti a si. Pumpak in kaa harh, ka hmurkaa kha ka thinlung ka lemrawiter kho lo. Lihchim kaa harh.

𝘒𝘩𝘳𝘪𝘩 𝘯𝘪𝘩 𝘍𝘢𝘳𝘢𝘴𝘪 𝘭𝘦 𝘑𝘦𝘸 𝘱𝘩𝘶𝘯𝘨𝘣𝘪𝘢 𝘤𝘢𝘸𝘯𝘱𝘪𝘢𝘬𝘵𝘶 𝘱𝘢𝘸𝘭 𝘵𝘪𝘩𝘯𝘢𝘸𝘩 𝘪𝘯 𝘐𝘴𝘢𝘪𝘢𝘩 𝘣𝘪𝘢 𝘢 𝘯𝘰𝘭𝘩. ‘𝘏𝘪 𝘮𝘪 𝘩𝘯𝘢 𝘯𝘪𝘩 𝘩𝘪𝘯 𝘢𝘯 𝘒𝘈𝘈 (𝘩𝘮𝘶𝘳𝘬𝘢𝘢) 𝘭𝘢𝘸𝘯𝘨 𝘪𝘯 𝘢𝘯 𝘬𝘢 𝘶𝘱𝘢𝘵, 𝘴𝘪𝘩𝘮𝘢𝘯𝘩𝘴𝘦𝘩𝘭𝘢𝘸 𝘢𝘯 𝘛𝘏𝘐𝘕𝘓𝘜𝘕𝘎 𝘵𝘢𝘬𝘵𝘢𝘬 𝘤𝘶𝘯 𝘢𝘯 𝘬𝘢 𝘩𝘭𝘢𝘵…’ (𝘔𝘢𝘵𝘵. 15:8).  𝘡𝘦𝘪 𝘵𝘩𝘪𝘭 𝘱𝘢𝘰𝘩 𝘛𝘏𝘐𝘕𝘓𝘜𝘕𝘎 𝘥𝘪𝘩𝘭𝘢𝘬 𝘪𝘯 𝘵𝘶𝘢𝘩 𝘥𝘪𝘯𝘨 (𝘒𝘰𝘭𝘰𝘴𝘦 3:23). 𝘈 𝘩𝘳𝘪𝘯𝘵𝘩𝘢𝘳 𝘤𝘢𝘯𝘨𝘮𝘪 𝘯𝘪𝘩 𝘭𝘪𝘩𝘤𝘩𝘪𝘮 𝘢 𝘯𝘨𝘢𝘩 𝘭𝘰 (𝘒𝘰𝘭𝘰𝘴𝘦 3:9).

Kaapahle biachim cu, velhle a si – thinlung in a rami bia a si lo, thluak in a rami bia a si. Khrihfa taktak nih a chim ding bia cu, thinlung in a rami lawng a si. Khrih sin i thla kan cammi bia le khat le khat sin ah kan chimmi bia tiang thinlung in a rami bia kha Khrihfa taktak hmurka a si. Thinlung nih, ‘A si lo,’ a timi kha hmurka in, ‘A si’, ti kha kaapahle cu a si. Kaapahle cu mizertiang le milihchim ziaza a si. Cucaah, ‘A si lomi’ thil kha ‘A si’, tiah chimfial hi Khrihfa tuah ding a si in ka ruat lo. Fial an kan duh ah, ‘Na kam i a ummi kha Khrih nih an dawt tuk vun ti,’ kan ti hna sehlaw, ‘biatak’ a si caah, a tlawm bik lihchim tal cun, kan luat hnga.

Biakinn i Pathian thangṭhat hi ‘social ṭhatnak’ caah a si ve awk a si ko lio ah Pathian thangṭhat khi numbar 1 a si. Social ṭhatnak ruah in, ‘Na thilhruk he naa tlak tuk; naa dawh tuk; na hmaipanh tuk,’ ti phun khi fial kan si ka zumh. Milunglawmhter cu, a ṭha teh. Asinain kan thluak kha 90% a dik ko ahcun, aho nih dah kaapahle cu aa zumh bal? Kaapahle in kan chim thawng in, kan pawngkam ṭhumi zumtu an i lawmh deuh lai ka zum lo. Kaapahle a si fam le. Khiti fial khi Baibal ah a ummi le Khrihfa zulhphung a si hlei lo. A kan fial tawn khi a phunphun in sullam lak khawh a si. ‘mi lawmhter duh ruang’, ‘biachim le holhrel thiam i cuh ruang’, ‘tuahkel ah cang seh ti duh ruang’, ‘siṭal thoh uar ruang’, ‘Pathian thangṭhatnak hlasak tuihnai deuh hna seh ti ruang’, tiah a phunphun in a sullam lak khawh a si. Mi a lawmhter hlei lai bel ka zum lo ka ti cang. Pathian thangṭhatnak ah kan tlo hlei ko tiah fianghlang in hmuh awk a um fawn lo.

𝐀 𝐓𝐚𝐰𝐤 𝐙𝐚𝐰𝐧𝐭𝐞 𝐀 𝐔𝐦 𝐊𝐨. Na kam i a ṭhumi kha Christmas ah ‘Christmas lawmhnak’ kut vun tlai ti tehna cu, fial tawk zawnte a si ko rua (Covid 19 bel a um le kuttlaih a ṭha lo kho). Min langhter a duh lomi chungkhar nih cu bantuk caah $500 an pek le kut benghpiak hna usih – hi zong a tawk zawnte a si ko rua. Minung kan muihmai, dawh le dawh lo kong le thilpuan hrukaih kong in i fial khi cu, hrial tlak an si. ‘A si bak lomi’ kha ‘A si ko’ tiah chimfialnak a chuahpi lengmang lai. Khiti mifial na hman ah khin na hmaika ah Khrih pum a simi pawl zapi khi na upat hna maw?

𝙆𝙝𝙧𝙞𝙝 𝙋𝙪𝙢 𝙉𝙖 𝙐𝙥𝙖𝙩 𝙈𝙖𝙬? Na hmaika ah a ṭhu ṭhupmi zumtu zapi khi Khrih pum an si. Na siangngakchia an si lo. Cawnpiaktu saya nu le saya pa nih siangngakchia rian a fial hna bantuk in na fial hna lo ding kha a biapi lai. Fial phun rumro uar khi Khrih pum upat lo hna in sullam lak khawh a si lai.

Minung takpum le muisam le thilpuan hrukaih fakter duh kong in na fial hna tik ah, an thinlung in ‘A si lo,’ an ti komi kha an hmurka in ‘A si,’ tiah chimter na zalh hna he aa khat. Na nawl zulh duh ah na fial hna ning in an chim tik ah, lih na chimter hna he aa lo kho na ti ve maw? Lihchimter ah kei ka ruah. Lihchim le thinlung le hmurkaa hlatter kha Khrihfa taktak nunzia a si lo. Khat le khat kan i hmaizah khi i fial phun rumro le nawlzulhter phun nih a mui a chiatter tiah ka hmuh. Na hmuhning in ahopaoh nih an hmuh ve a herh lo, ka hmuhning in na hmuh ve a herh fawn lo. Pumpak kan khuaruahnak hi i upatpiak a herh hringhran. By B Chan Khar

Leave a Reply