BENJAMIN SUM ! NA INN NGAI NA THLENG HRIH LO. Myanmar Idol Runner Up Benjamin Sum cu tusunah a tlung ti thu ka theiih, ropi zetin nan hmuak ti tla ka thei. Asinan Airport lawngah si lo vin nan hmuahnak video a phunphun ka vun zoh tikah a sunglawi ka ti nasa ih, khatlamah hi thu hi ka thinlungah a hung umih post ka ra tuah. Siar suak ta locun comment awi lo aw. Tui hlanah Henry C. Morrison timi America mi cun Africa ramah Missionary hna tuanin a rak um. Missionary kum 40 a tuan hnu cun an khua le ramih tlung dingin a sungkhat unaupawl le kawhhran mipipawl cu a theihter hai.

Ticun an khaw pan cun a feh vivo. An khua a thlen zawngah lawngpi tum tak ihsin a vun suak cu mipi tamtak hin mi hmuah an neiih an rak phul celcel hi a va hmu. Asinan a mah hmuaktu an um loih mak a ti zet. A mangbang in Lawngpi hnatuantu pakhat cu a hei sutih cupa cun “Ka pu, hi lawngpi ah hin kan ram USA president Theodore Roosevelt khal a to veih na sungkhat unaupawl le na kawhhran pawl khal cu president hmuahnak ah hin an tel ve a si ding” ti’n a sawn.

Henry Marrison ih thinlung cu fei sun bangin a na ih a lam hruaitu Bawipa Pathian hmaiah a vuiih riahsia zetin hitin thla a cam. “Bawipa, Roosevelt hi ka tlawngkaipi a si. A nih hnakin ca khal ka thiam thei. Kan tlawngah pakhatnak cotu ka si laiah Roosevelt cun pathumnak a co ban ceu a si ti na theih kha.

Tu ah hin kei hnakih ca thiam theilo sawn le na hna tuannak hnakih leitlun politics buaipi sawntu cu mi tampiin an sunlawih ih an ra hmuak. Kei cun, ka ropitnak ding le ei le in ka hawlnak dingpawl khal fehsanin na thu vekin Africa ram lamah hreum tampi tuarin na hna ka tuanih kum 40 sung rori nangmah ruangih retheih zonzai ka ton hnuih ka ra tlun sun khalah hmuaktu khal nei loin ka umih, kum 40 sung rori na lakih ka rinumnak cun ropitnak pakhat hman a nei ban lo hi ka thin a na ih na parah ka vuivai rori a si” a ti.

Cutiih Bawipai hmaiih vuivainak mitthli le thlan ti tla cing cun ni sa lakah a thirkuang cu a pu zo si loih hri thawn nuam teten a hnuk phahphah rero. Thinheng le riahsia mangbangih thla a cam theh veten “Henry, na mitthli a tla maw si!. Na tap maw? Lei le van uktu si hman nungna ka lamzin le ka tuarnakpawl cu na hngilh zo maw! Ziangah na vui? Roosevelt cu khawvel mi a siih khawvel ta a si, khawvel in an cawimawi ding a siih khawvel nawmnak zaten a ta si ding khalin a thiang ho khaw.

Nang lawng te hi khawvel cu na khualtlawnnak ram le mikhual ih na vah tawihnak ram men a siih, nehhnu na inn na ra thlen tiklen van mipi siar cawk lo ih tamin sunlawihnak famkim zet thawn sunglawi zetin an lo hmuak ve ding. HENRY, NANG CUN NA INN NA THLENG HRIH LO ti’n a thinlung ih thu a ra um thut cu hreum a tinak le a tuarnakpawl ruangah vuivai nawn loin hlawhtling zetin a cân a hmang liam a si.

Benjamin Sum! Hi ka ca hi in rak siarsak ve aw la, tui tumih lo hmuaktu hi aite sinnak men a si ti theiin na inn ngai na thlen tikah cun tu hnakin sunglawi le ropiih lo hmuak dingin zuam sin aw tiin na hrang sa duh ka thah. Ka lungawi. Credit: ‎Salai Medal-Pui Tuallawt Emem‎ (Falam Today Media)