Benjamin Netanyahu Sawmnak Cu Gantz Nih A Cohlanpiak Duh Lo

Israel PM (incumbent) Benjamin Netanyahu nih “Blue and White” party hruaitu Gen. BENNY GANTZ a hruaimi party ah i fonh in, Israel ram cozah thar “Unity Gov’t” ser ding in a sawm nain Benny Gantz cu a sawmnak cu a cophanpiak duh lo. Mah hi ruangah Israel ram nih kum khat chung ah General Election voithum khelte ngaih khawh men. sinain, President Reuvin Rivlin nih cun PM sinak rian a tlai lio mi Benjamin Netanyahu cozah thar a ser khawh ttung lo ahcun Benny Gantz hi cozah thar dirhpi ding in a sawm lai,”tiah zumh cio a si.

Likud party le a ttuanpi Shas party, United Torah Jewish party le Orthodox nationalist Yanima party hna nih cun Neyanyahu nih a hruai lomi cozah dang rianttuannak dirpi an timh lonak kong cu ttial in thanhnak an tuah ve ti a si. Left-wing liberal Benny Gantz phu le a ttuanpi Democratic Camp, Labor party le Gesher hna le Arab Joint List nih cun Benny Gantz hi dirpi an duh i, cun Yisrael Beitunu party Avigdor Lieberman hruaimi hna zong nih an dirpi a si ve ahcun Israel ram nihPM thar dang an hmuh khawh mi a si.

Avigdor Lieberman nih hin Sunday ah hin President Reuvin Rivlin a hmuh lai i, thil um tu ning a fiang dih lai tiin zumh a si. Cu lio ah Benjamin Netanyahu belte Oct 2-3-ah Court ah eihmuarnak le phaisa ning cang lo hmannak (fraud) kong ah biahalnak ngaih ding in Attorney General nih thanhnak a tuah ve.

Likud party hi Kulanu party nih hmunkhat rianttuan piin, April 9 lio thimnak ah khan seats 4 an hmuh hi si. Right-wing party Likud tu nih hin April i thim lio nak in seat 35 chung in 32 lawng an hmuh i, mipi hna nih kum 10 chung a bawi cang mi Benjamin Netanyahu rianttuannak hi an duh tuk ti lo timi a lang. Hi kongah President Rivlin nih cun zerh 6 chung in cozah ser kho an um lo ahcun, Knesset thimnak a tuah tthan lai. Sinain PM Netanyahu tu nih cun thimnak tuah tthan hi a duh ti lo ti chim in, Benny Gantz hi “Unity Gov’t” dirhpi dingin a sawm nain Gantz nih  Benjamin Netanyahu sawmnak cu a hnawlpiak diam.

Benny Gantz, Benjamin Netanyahu le Reuvin Rivlin hna cu nizan ah Jerusalem i Mt. Herzl hmun i President tthing a thi cang mi, Shimon Peres philhlonak caan hmannak hmun ah an i hmu. Ehud Barak le Shimon Peres nih hin term canceo ah PM an rak i thlen bal bantukin, PM Netanyahu zong nih Gantz he cozah i hrawm ding in a duh nain cu a saduhthahnak cu tlin khawh dawh si ti lo.