Zeitluk in dah chungkhar hna an lung retheih lai mu, zaangfak taktak khi si. Zeican tiang khi dah a va tuar lai i, a va i thlopbul rih lai? Ramkip um Lai hritlai hi kan upa Pu Lai Hnin (Bawm) in tuarnak le harsatnak ah na kut rak samh ve. Mah kan upa Pu Lai Hnin (Bawm) tuarnak le sining cu a tanglei bantukin theih si.

GBB: U le nau hna khua ruah ruah ah hin apitchong ti mi hi a si taktak ko. Minung hi har ciocio hmanh ah hin, har chin, chinchin khi kan va um rih. Atu zong Bawm kan unau pa, Pu Lai Hnin cu, Tikir lei rak hawnnak ding caah tiah, aa hlawhfa. Cu a rianttuannak ah cun, vanthiat ah Thlalang nih a tanpor a rak aah.

Cu ti a dam lo bu cun an ratpi tikah a hma cu a zual ngai cang ti asi. Thantlang sizung nih ah an thlop khawh lo caah Kalaymyo Ralkap Sibawi sinah an kalpi. Nain a rak tlol ngai cang caah tanpiak a hau men lai ti asi. U le nau hna ngaihchia taktak khi asi. Zeican khidah an va tuar rih lai. A hmanthlak kan hmuh bantuk khin zaangfak taktka khi si ko. Cucaah damnak zong a hmuhnak hnga thlacamnak le chawva zong in mah le ti khawh tawk tein bawm cio hna usih. Ref: GBB

 

Relchih: Pathian cu Dawtnak asi. (God Is Love) Pakhat le pakhat aa daw lomi nih cun Pathian kha an hngal lo, zeicahtiah Pathian cu dawtnak a si. I John 4:8 Nihin hi Jesuh Khrih chuah lai hngahnak ‘Advent’ zarh 4 nak a si. Nihin kan tlangtar cu Dawtnak ‘Love’ asi. Kan Baibal Cathiang chungah DAWTNAK timi biafang hi voi zeizat dah a um? Acheu nih version 17 ah buaktlak in tuak ahcun voi 588.7 a um ti a si. Acheu nih version dangdang zohkemh in tahchunhnak ah NIV 505; NLT 581; NLTSE 592; TNIV 202; etc. ti in a um an ti ve.

Dawtnak timi biafang a hmang lo nain a sullam aakhatmi zong tampi an um rih. Johan 13:35 ahcun, “Pakhat le pakhat nan zawn nan iruah ahcun mi vialte nih, hi hna hi amah a zultu kha an si, tiah an in hngalh hna lai,” tiah a chimmi kan hmuh. Baibal a muru a simi cu: “Pathian nih vawlei a dawt hringhran caah a fapa ngeihchun Jesuh Khrih a kan pek,” Johan 3:16 timi hi a si.

Tuanbia pakhatte in vun zoh hnik hna u si: Voikhat cu KUMTHAR NI ah khahmul sau ngaimi tar pathum khual an tlawng. An min ah Pu Rumnak ‘Wealth, Pu Fimnak ‘Wisdom, le Pu Dawtnak ‘Love’ an si hna. Inn pakhat ah tlun dingin innka hram ah an dir i innka an kingh. An fanute nih innka a rak onh hna. Tar hna nih tuzan nan inn ah kan riak kho hnga maw? tiah an ti. An fanute cu mifim lung varte a si. “Ngahtuk kapu,” tiah a ti hna. Tar pakhat nih, “Um rih, chimh kan in philh deng. Kan pathum in innkhat ah tlunawk kantha lo. Kan min cu Rumnak, Fimnak, le Dawtnak kan si. Na duhmi pakhat kanthim law cu nih cun nan inn ah kan tlunglai,” tiah anti than. A fanute nihcun, “Ka nu le ka pa ka vachimh ta hnalai,” a ti i innchung ah chikkhatte a luh tak hna.

Inn chung ahcun an pafarual in bia an i ruah. An nu nih, “Kan si a faktuk hih, Rumnak hi tlun inn onh u si,kan rum venak ding tal a silai” tiah a ti colh. An pa nih aathawh ve i, “Fimnak hmeteh. Kan fim dih ahcun chawva cu kan kawl khawh ko lai si,” tiah a tive. An fanute nih aa ruat hnu ah, Kanu le kapa kei cu Pu Dawtnak hi tlun inn onh u si ti ka duh. Dawtnak hi a herh cem ko, a tive hna. Anu le apa nih, “Si ne seh,” tiah an hnatlakpi. Cu caah innleng an hung chuak i, Aho hi dah Pu Dawtnak cu nan si? Pu Dawtnak kan inn tlun dingin bia kanchah,” tiah an tihna.

Cu ahcun tar hna cu an pathum in innchung luh an hung zalh. Nute nih Aih aih. Pu Dawtnak lawng pei kan in ti hna si, ziah nan pathum in luh nan timh?” tiah a ti hna. Anlehmi cu “Rumnak le Fimnak kan thim uh law nan kan thimmi lawng nih kan in tlung hna hnga. Dawtnak nan thim caah kan pathum in lut kan hau. Zeicahtiah Dawtnak a kalnak paohah a dang pahnih nih kan zulh peng veee,” tiah an ti. DAWTNAK umnak ah zeipaoh tlam a tling. Zeicahtiah “PATHIAN CU DAWTNAK A SI” ‘God Is Love’ 1 John 4:8. Tukum Christmas December 25, 2012 Ni ah Dawtnak Pathian cu tlun inn onh cio hna u.