Bawipa Nih A Ka Chawnh Tawn: Rev. Benjamin Khamh Bawi

Sermon

BAWIPA NIH A KA CHAWNH TAWN.Voi khatnak tam Bawipa Biachimmi (Aw) ka theih cang…” (Salm. 62:11).

Image result for benjamin khamh bawi

Rev. Dr. Law Ha Ling (CBC, GS) nih, “Bawipa nih a ka chawnh tihi zeitindah ka hngalh khawh lai,” tiah nan ka halmi biahalnak cu a lehnak a um lo, zeicahtiah an rak chonh bal lo caah a si, tiah a chimmi voi thum tiang ka theih. Rev. Dr. Van Ram Uk nih, “Bawipa nih zeitindah an chawnh tiah an ka halmi cu zeitindah leh hna lai, kan let kho hna lai lo, nangmah tein Pathian hal u, rawlul u,” a timi voi hnih ka theih. Pathian nih a chawnhmi Pathian minung hna an tampi. Kei zong BAWIPA nih a ka zaangfah tuk caah a ka chawnh lengmang ko. Baibal Thiang ka rel caan ah, cu ka relmi Bia hmang in a ka chawnh, ka mangah a ka chawnh, thla ka cam lioah siseh, ka cam lo lio caan zongah siseh ka chiatha hngalhnak (conscience) ah a herh a ti caan paoh ah a ka chawnh tawn..

Bawipa nih a ka chawnhnak hmun le a ka chawnhning cu a tampi nain tlawmte lawng ka hun langhter lai.

1. Kum 1996 lioah Zepi Khua i Pu Biak Cung te inn cungdot i kaa hngilh thawt saling ah, “Khamh Bawi, Khamh Bawi, ka Fapa Jesuh Khrih tehte caah kan thimmi na si,” timi aw nih a ka tthangh. Ka zung i kaa hngilh tthan. Cun hmasa i Aw bantuk nih a ka tthangh tthan i ka tho i Tual ah ka va tthu i khua ka cuan. Van Arfi le Thlapa an Ceu tthat tuk caah Fing le Tlang fiang tukin an lang hna. Zinglei Suimilam 3 in 4 tiang khua ka cuangh hnuah ka it tthan.

2. Kum 1998 lioah Senthang peng ka rak tlawng i Leipi khua in Khuahrang leiah ka kal. Lampi ah Thawngtthabia phuangtu le a rak tlahtu minung 4 ka tawn hna i Evangelist nu nih, “Saya Pa Bawi, ruahlo piin aa, a ttha tuk, khuahrang ah tthanghnak nganpi kan co, na va pehzulh lai i pakhat nu cu profet biaphuan hmanh a ngei kho te,” a ka ti. Cuticun an lan i ka lan ve. Khuahrang phak lai Lungdonh ah thla ka cam i, ka chiattha hngalhnak lungthin (conscience) ah, Bawipa nih, “Khuahrang khua i profet hmanh a si kho an timi nu kha khuachia rianttuannak a si,” tiah a ka chimh. Zarh khat crusade ka pehzulh tikah khuachia hlenmi a sinak kha mi zapi hngalh dingin a lang taktak.

3. Kum 1999 lioah asi rua ka ti (a kum ka palh kho), USA ram in Oral Robert University i Professors hna nih Yangon ah cawnpiaknak an tuah i an ka sawm ve caah kaa va ter kho ve. Kan kir leiah Mandalay in Hakha lei kainak Tiket kan cawk lioah Bawipa nih, “Hika khuapi ah hin ka rian na ttuan te lai,” tiah a ka chawnh. Culio bak ahcun ka pawng i a dirmi ka hawipa Thawng Hei (Rev. Thawng Hei, hi a tu cu Open Church, Yangon ah Senior pastor a tuan cang), ka chimh colh i a ka nih sawhsawh ko. Atu cu amah tu nih, “Kha lio i na rak ka chimhmi kha a tling ko hi ta,” a ti cang.

4. Kum 2006 lioah a si. Mizoram Lunglei khua i Pi Tial dawr ah rian a ttuantu Ruava khua, Zotung nu hnam nih a tuah thla rak campiak ta, tiah an rak ka auh i, ka kalpah ah, “A phunphun in bia a chim te lai nain zumh hlah,” tiah Bawipa nih a ka chawnh. An innthlang zawn ka phakah a au i, “Ziah hipacu nan auh, ka ttih tuk, ka kal cang a ti i,” aa hngilh bantuk in aa umter. A chuak cang, a dam cang, an ti i an i nuam tuk hna. Asinain a hlenmi hna a si. Baibal ka rel i Chiti ka thuh i thla ka campiak cu, “A lin tuk, a lin tuk, tiah a au i,” minutes 3 hrawng kan cam ah a chuak.

5. Kum 2007 lioah a si rua ka ti, (a kum ka palh kho), Siatlai khua i Crusade ka rak tuah i Biakinn chung i zingka te i thla a ka cam lioah a ka chawnh i, “Hika khua chungah kum 12 a ngawr cangmi a um, Jeim 5:13-16, chung bia bantukin chiti thuh law thla va campiak,” a ka ti. Biakinn in ka chuak i an pastor pa sinah, “Nan khua ah Kum hlei hnih a ngawr cangmi mizaw a um maw?,” tiah ka hal i, “Um e, a zeeng dihmi a si,” a ka ti. Cun a sinah cun len dingin kan zuang i, a ihkhun in inn chungah an luhpi lio khi kan hei hmuh manh. An inn chungah cun kan lut i, “Nitlang ka to duh a kan ti i, innkhun in ka cawi i nitlang kan tohter, cun a sa tuk cang ka luhpi cang u,” a kan ti caah atu bak hi kan luhpi, hitihin kum 12 kan si cang ko e, saya pa aw, tiah inntek nih an ka ti. Bawipa fialning bantuk in chiti thuhnak le thlacamnak kan ngeih hnu ah kan ttin. Zan ah a rak i pum i lunglawmhnak bia tehte a khan.

6. Kum 2015 kum dih lei hrawngah a si rua ka ti, (a kum ka palh kho men), Falam i FBC Biakinn piah mi pakhat thla ka rak campiak. Bawipa nih, “Nithum campiak law a dam lai,” a ka ti. Cu ni thawkin ni thum chung rawl ka ul tiin kaa tim. Ka ul hnik i rawl ka ul kho. Ka khuaruah a har tuk! Cucaah ka ei tthan. Nithum chung thla kan cam i ni thumnak ah a dam taktak. Amah hi kum tampi a holh loin a hrut cangmi a si tiah an ka chimh. Voi dang ah ni tampi zong rawl ka rak ulh ko nain kha lio caan i rawl ka ulh khawh lo kha, ka rawlulh ruangah si loin, “Ni thum chung campiak law, a dam lai,” timi Bawipa AW ruang tuah a dam tihi BAWIPA nih a ka hngalhter duh caah asi timi kaa fiang.

7. Kum 2005 in Falam ah kan um. Kan nu hi Sianginn Cachimtu JAT a si caah khuadang ah i tthial awk kan ttha lo. Khrihfabu ah member laknak ngei loin Bu kip ah kaa pum. Thawngtthabia chim ding a ka sawmtu hna sinah kaa pumh caan a tam. Kum 2011 ah ram le miphun caah, Falam Khuatlang huap in Zion Thlacam inn ah ni thum le zan thum rawlulh in thla kan rak cam. A zan hnihnak ah Bawipa nih a ka chawnh i, “Falam Baptist Church,” ah Member la law khuaruahhar thil kan tuahpiak lai a ka ti. Inn lei kan tlun in, ka chungkhar ka chimh hna i FBC ah Member ka lak. Member luhnak thlacam lioah thla a ka campiaktu le thawngtthabia chimtu hna nih an ka duh leem lonak (an biafang hmanmi ah) an langhter. Asinain BAWIPA Aw kha biapi bikah ka chiah caah ka zei a poi lo. Cun kum 2 hnuah FBC le Falam khuatlang i a um bal lomi Khuaruahhar thil cu BAWIPA nih a tuah taktak.
(Chim ding tampi a um rih nain, hi vial in si chung rih seh).

BAWIPA nih a ka chawnh tikah Amah Sunparnak a lang zungzal. Biakam Hlun chan lio i Profet hna bantukin kan theihmi BAWIPA AW (Bia) hna hi Baibal ah an i cang lai tinak a si hrimhrim lo. Nizan, Nihin le Zungzal in amah ning a simi A Nungmi BAWIPA Pathian nih, a herh a ti ahcun amah duhning paoh in a kan chawnh ko. Mi cheu nih, “Tu chan ah Bawipa Aw theih a um ti lo, Vancungmi nih bawmh, tawn a um ti lo,” an timi hi BAIBAL THIANG chungah a um lomi, anmah ruahnak le zumhning sawhsawh a si.

Mi cheu khat nih an timi, “Vancungmi nih bawmh, chawnh, biak, a um tilo,” timi hi dik sehlaw cu Misual Khamhnak Thawngtthabia phuan a si tilo tinak a si hnga. Sihmanhsehlaw khamhnak kong phuan a si rih i zumtu lak ni tiang asiloah kan thih tiang phuan peng a si ko lai caah Vancungmi nih an kan bawmh zungzal ko rih lai. “Cuti asiahcun Vancungmi hna cu ahodah an si? Annih cu Pathian riantuantu thlarau an si i khamhnak a co dingmi hna bawmtu an si.” (Heb. 1:14).

Credit: Rev. Benjamin Khamh Bawi

Leave a Reply