Baibal Thiang Cawnpiaknak (Doctrine) Dik: Baibal Thiang cu a palh lomi zumhtlak Cathiang a si. Nihin Khrihfa hna nih a dik lomi cauk le minung tuahchommi cawnpiak (Doctrine) hna ah hram kan bunh sual maw? Pathian thawchuahhnawhmi a palh kho lomi Baibal Thiang tuah hram bunh cio ko hna usih.

1. I Phuannak Phun Hnih: Mithiam hna nih Pathian cu minung sinah phunhnih in aa phuang an ti i, cucu ka co hlan ve. Hihi Khrihfa nutling, patling nih hngalh hrimhrim a herh. Cu hna cu, (1) Sermi thil in i phuannak (Natural Revelation) le (2) A hleiin i phuannak (Special Revelation) an si. A hleiin i phuannak cu Zungzal A Hmunmi BIA cu PUMSA ah ai cang i a tlaumi minung hna khamh awkah PATHIAN cu minung ah a run i cang. Pathian nih a hleiin aa phuannak tlamtling deuh in kan hngalh khawhnak cu a palh kho lomi Baibal Thiang ah ttial a si.

2. Baibal Kong I Dohnak: Dr. Kennedy, Cambridge University i Religious Professor of Classic nih, Kum zabu 20 hramthawk lioah khan, “Baibal nawlneihnak kongah hin dohnak a har ngaimi le a liannganmi a chuak te lai,” tiah ralrin peknak (warning) a rak ngeih cang. A chimmi cu, “Khrihfabu le Vawlei i dohnak a hnubik a si dingmi cu Baibal Thiang thawchuahnak kong hi a si,” a rak ti.

Zudawr ah Baibal Thiang zeirel loin capo ah saih hna sehlaw ngaihthiam khawh asi ko lai. Sihmanhsehlaw Khrihfabu chung i rianttuantu hna cheukhat nih, “Baibal Thiang a palh kho lo timi ka zumh,” ti riangmang in Baibal Thiang Cawnpiaknak (Doctrine) he aa kalh in asiloah Baibal Cawnpiak duhnak merh timh, Kawiter timh in Pathian Khrihfabu cawnpiak lengmang hi cu lungfah lo awk a ttha hrimhrim lo. A bikin Khrihfabu chan i Rianttuantu Thiang Thlarau Tthawnnak Mei Hmih timhnak nih a tu lio Laimi Khrihfabu chungah tthawng ngaiin rian a ttuan.”Zeitintiah Pathian nung, Ralkapbu Jehovah, kan Pathian bia cu nan merh dih cang.” (Jer. 23:36b).

3. Cawnpiaknak or Zumhnak Thiang (Doctrinal Purity)

Cawnpiaknak dik (sound doctrine) le zumhnak i thiannak (doctrinal purity) caah cun Pathian Bia Baibal bakah hram bunh ding a si. Mah pomning he aa tlakning in duh paoh in i khuaih le merh timh cu Satan hlennak a si. Satan nih mihrut a hmang lai lo; Grik holh, Latin holh, Hebru holh a thiam mi, mithiamsang deuh kha a hman hna lai, zeicahtiah mi hlen khawhnak tthawnnak anmah ah a um caah a si. (Gen. 3:1). Pathian bia hi zatlang hlennak ah kan hmang lo…” (2 Kor. 4:2. Dr. Rual Uk Lehmi). “…Pathian Kong zongah kanmah duhning in kan merh lo.” Falam Holh- Dr. S. Hre Kio lehmi). “…Pathian bia zong kha hlennak ah kan hmang bal lo…” Dr. S Hre Kio lehmi, “Pathian kong zongah kanmah duhning in kan merh lo,” timi te hi ka hun hman lai.

4. Baibal Cawnpiakmi Pathian Rianttuanning

Baibal Thiang nih, Pa, Fapa le Thiang Thlarau rianttuannak kong hi fiang tein a kan cawnpiak. Nihin Khrihfa mi cheukhat cu an zumhnak hram bunhnak Cawnpiaknak (Doctrine) an i fiang hna lo. (1) Pa Pathian nih Fapa Jesuh Khrih nih misual a kan khamhnak ding kong cu profet hna hmangin a rak chimchung. (2) Jesuh nih Pa Dawtnak kong kha phuan in mi a hngalhter hna i Vailamtah cung i thihnak le thawhtthannak in Pa a dawtnak a langhter i Pathian duhnak ngan bik Misual Khamh rian cu a liim. (Joh. 1:18; 14:31; 1 Tim. 2:4; Joh. 3:16). (3) Thiang Thlarau nih cu Jesuh Khrih Khamhnak Thawngtthabia phuan rian cu a pehzulh. (Joh. 8:32; Zek. 12:10; Tit. 3:5; Lam. 16:6-10).

5. Baibal Cawnpiakmi Thiang Thlarau Le Khrihfabu

Khrihfabu a um hlan ah Thiang Thlarau a um i Baibal Cauk a um hlanah Thiang Thlarau le Khrihfabu a um hmasa. Baibal Sianginn a um hlan ah Khrihdabu a um hmasa. Cucaah Khrihfabu cu Thiang Thlarau nih a hruai awk a si. Baibal Sianginn i cawnnak nih Khrihfabu a hruai awk a si lo. Thiang Thlarau nih a hruaimi Khrihfabu sinah phuanmi biatak Cawnpiaknak (Doctrine) tu kha Baibal Sianginn ah cawn dingmi a si. Baibal Sianginn ah hin zumhning phunphun le fimnak a dangdang kong le tuanbia kong hna hi cawn awk an si lo, ka ti duhnak si loin Baibal Cawnpiakmi Kong i dirhmun dik i ngeih caah ka tinak duhnak a si.

Khrihfabu chan timi cu Kamkaltu dal hnih in aa thawk i Biathlam dal thum ah a dong/dih te lai. Khrih nih, “Khrihfabu cu keimah nih ka dirh lai,” (Mt. 16:18), a rak timi cu Thiang Thlarau nih Penticost ni ah a takin a tlinter i a umhnawh beh i a kaltak tthan ti lo. (Lam. 2; Efe. 2:19-22).

Khrihfabu cu Khrih pum a si i pumpak hi a nge kan si hna i Khrih pum tthanchoter dingah ttuanvo pekmi kan si dih hna. Cucaah Thiang Thlarau laksawng kha Pathian duhnak he aa tlak ningin pek cio kan si. (1 Kor. 12:1-4). Khrih pum (Khrihfabu) tthanter dingah Thiang Thlarau laksawng pek kan si timi cu phundang in chim ahcun Thawngtthabia karhter rianttuan kha a si. Khrihfabu caah pekmi Thiang Thlarau laksawng cu phun (27) a um. Khrihfa Bupi huap caah pekmi le pumpak caah pekmi tiin tthen hnih ah tthen a si. (Rom. 12; 1 Kor. 12; Efe. 4:12; 1 Kor. 7:7; Rom 15:19, 20).

Khrihfabu caah pekmi Thiang Thlarau laksawng cu Khrihfabu chan chung Zumtu lak (Rapture) Minmei Cung i Khrih a langh in zumtu nih kan mit in kan hmuh tiang (1 Kor. 13:12,13; 1Joh. 3:2,3), thawngtthabia karhnak caah kanmah le kan kaptawk cio in kan hman dingmi an si. Kan comi cio Thiang Thlarau laksawng hman timi hi Baibal nih, “Nunter,” tiin a hman ve. Na hman lo ahcun a nung lo tinak a si i na hman lawngah man a ngei tinak a si. (1Tim. 4:14; 2 Tim. 1:14).

Thiang Thlarau Tthawnnak le Thiang Thlarau laksawng co loin donghnak caan asimi a tu Khrihfabu chan ah hin Khrih tehte si khawh a si lo. (Lam. 1:8; 1 Pet. 4:10). Cun duhmi lawng cohlan i duh lomi doh awk a si lo. Kan comi laksawng lawng upat i midang comi laksawng zeirello le soisel cu thlarau lei ngakchiat ruangah caah a si. Mah comi laksawng lawng cung sangpi chiah i midang comi zeirello le doh hi Korin Khrihfabu an rak buainak a ruang phun khat ah aa tel vemi a si. Khrihfabu caah pekmi Thiang Thlarau laksawng hi pakhat hmanh a dong/dih rih lo. A ngaingai ahcun Thiang Thlarau a dihtermi hna cawnpiaknak (Doctrine) hrampi ahcun Khrihfabu chan zong a dih cang, an ti. Mi cheukhat nih an zumhnak hrampi hngalh taktak loin kan hei au ve sawhsawh!

Chim ding tampi a ummi chungin tlawmhpal te lawng(a tu lio i a kangsar deuhmi) ka hun langhter lai. Efesa 4:11,12, chung i, Lamkaltu, Profet, Pastor, Evangelist le Cawnpiak Saya panga chungah kan duhmi cu a um rih kan ti i kan duh lomi cu a dih cang, kan ti. Baibai Thiang nih, “Profet biaphuannak nih Khrihfabu kha a ning piin a bawmh i holh theihlo a holhmi nih amah le mah aa bawm,” (1 Kor. 14:4), a ti ko nain, “a dik cang,” a ti na, “ka fih,” a ti na, capo saihnak caah a hnang na nan si hna.

Profet a dih ahcun hngalhnak ngeihmi, thiamnak ngeihmi (1 Kor. 13:8) vialte zong an dih ve lai, tinak a si. Science lei fimnak in an thiamnak, psstor, evangelist siseh zumtu nih siseh thlarau lei i hngalhnak kan ngeihmi vialte a dih ve lai. Aho kan si hmanh ah zeitluk in thlarau lei i a sangmi le Baibal Thiam an si zongah Pathian kan hngalhnak le Biatak kan hngalhnak hna hi a cheuchum lawnglawng an si rih. Jesuh Khrih muisam hmanh kan i fiang dih kho rih lo. Amah he hmaitonh tein kan i tawn tik lawngah kan hngalhnak a tling te lai. (1 Kor. 13:12,13; 1Joh. 3:2,3). Tling tein kan hngalh dih rih lo caah Pathian hngalhnak le Biatak hngalhnak ah Vawleicung kan nun chung vialte, asiloah Zumtu lakni (Rapture) tian g kan tthan peng awk a si, tihi Baibal Thiang cawnpiakmi Biatak cu a si. (2 Pet. 3:18; 1 Joh. 3:2,3; 1 Tim. 6:11,12; 1 Kor. 9:25-27).

Baibal Cawnpiakmi (Doctrine) kong he pehtlaiin a dikmi dirhmun fek kan ngeih khawhnak hnga Thiang Thlarau he Baibal Thiang tampi kan rel a herh. Cun Thiang Thlarau hruainak tangah Baibal Thiang a rel i nun a cawngmi sinin kan cawn chim ve a herh. Zeicahtiah zumhnak cu theihnak (hna theihnak-hearing) in a ra (Rom. 10:17), tiah Cathiang nih a ti caah a dik lomi zong kha na theih tam deuh ahcun na zumh ko lai.”Khrih kaa zohchun bangin, rak ka zohchun u.” (1Kor. 11:1). “Khrih nih a sinah nun cawng u,” a kan ti. (Mtt. 11:28-30). “Cawnpiaktu Saya tthabik Thiang Thlarau sinah cawng ding kan si.” (Joh. 14:25,26; 16:12-15; 15:26).

Credit: Rev. Benjamin Khamh Bawi