Lunglawmhnak thawngpang a hung um ṭhan. New Zealand ram ah khuasami, Hriphi khuami hlasakthiam awṭha Van Hlei Sung nih harnak a tong cuahmahmi thlanglei laitlang Paletwa kan unau hna bawmhnak 163,200/-MMK a pek hna tiah theih a si. Lawmh a tuk hringhran.

Awṭha Van Hlei Sung a chuahkehnak taktak hi Hriphi a si i New Zealand ahhin 2007 Aungust 17 ah an rak phan. Cun, amah hi midang bantukin rianṭuanmi a si lo. Victoria University of Wellington ah Commerce kai liomi a si.

“Bawmhnak na pekmi hi Chin Paletwa ralzaam hna na bawmh hna lawng si loin, Myanmar ah lungrualnak le daihnak a um khawhnak hnga na thazaang na chuah zong asi,” tiah Chinland FC lei nih an lunglawmhnak an langhter.

“Chinland FC cu Chin miphun le Chin state ai-awhtu dingah rak dirhmi a si i pumpululh lawng hi kan i hmuitinhmi a si lo. Kan miphun lungrualnak le hmunkhat i um khawhnak dingah kan izuammi a si i, hmailei kan karhlannak zongah thazaang chuah in na kan ṭanpinak lai zong kan in nawl duh chih,” tiah Chinland FC hna nih lungbawmhnak bia an ṭial.

Minote lawng a si nain atubantukin miphun dawtnak le zawnruahnak a ngeihmi hi lung hmui khun i zohchun awktlak taktak a zong a si tiah ka ruah. Hi bantuk lungput hi Chinmi kan herhmi zong a si. Kan farnu awṭha Van Hlei Sung zong fimthiamnak a cawnnak ah Pathian umpi in lam hruai sehlaw, a aw le zai zong thlaw chuah hram ko seh! Chirhchan: Chinland FC