Tuni hi Laimi nih hlaphuah leiah siseh hlasak leiah pacan dirhmun in ka i ngeihmi Rev. H. Thomas Ṭial Uk chuahcamtuak/chuahni a si. Atu bantukin a chuahni camtuak nisunglawi zong dam le lawm tein aphak khawh caah lawmhmi cio hna usih. Rev. H. Thomas Ṭial Uk cu a ho cio paoh nih kan theih dih lai tiah ka ruah.

Pathian thangṭhatnak hla atulio kan hlasakthiam pawl nih an sakmi hi a tam deuh cu Rev. H. Thomas Ṭial Uk nih aphuahmi deuh ngawtte an si hna. A hlaphuahmi hrimhrim hi an ṭha kho tuk hna. Cun, a hla pawl hi an nung khun tiah ka hmuh. Group song siseh, deut tibantuk a phuahmi zong hi a ngaih nuam hi a hlabia an ṭha taktak hna.

Cun, Rev. H. Thomas Ṭial Uk hi amah hrimhrim hlasakthiam minthang pakhat a si. A hlasakmi hrimhrim hlonh awk an um lo. A hlabia an ṭha, an nung fawn. Amah zong hi kum upa lei apanh cang ko nain a duai kho hrimhrim lo. Pathian nih a cawisan chin lengmang ti hmuh khawh a si. Cun, Laimi single hlasakthiam tampi a rak dirkamhtu hna le domh cawitu hna pakhat a si tiah ka ruah.

Amah nih a phuah i asakpi na a dirkamh zungzal hna i amah sinin hlasakthiam tampi an chuak ti hmuh khawh a si. Atu bantukin a chuahni camtuak nisunglawi zong hmaleiah a hmu kho ṭhanmi a si nak nga thlacamnak in bawm cio hna usih. Hmalei a nun lamthluan ah Pathian nih umpi in kilveng siseh a tehte salṭha ah hmang zungzal ko seh!

Rev. H. Thomas Ṭial Uk chuahni kong he pehtlai in hlasakthiam Iang Len Sung nih hitihin a lunglawmhnak a langhter ve “Happy Birthday Kapa. Bawipa nih nun khuasau nak le ngandam nak thluachuah in chap chin ko seh. Nan cungah kaalawmtuk ee Nihin ni dirhmun ka phak khawh nak hnga ka taw nan ka domh nan ka dirkamh nan ka zohkhenh nun nan ka chimh.

ka caah cun thluachuah lianngan tuk nan si. Nan cungah kaalawmtuk ee. Zohkhenh awk ka tlak lo le Dirkamh awk ka tlak lo zongah Nanka dawt nak ruangah Nan ka zohkhenh i nan ka dirkamh zungzal kaalawmtuk ee Bawipa nih thluachuah inpe chin ko hna seh. Kan dawttuk hna KaNu le Ka Pa,” tiah a lunglawmhnak a langhter ve. VIDEO timi rak hmehlaw Rev. H. Thomas Ṭial Uk hlasakmi rak ngai ve.