Chinmi minṭhattertu Awṭha Esther Dawt Chin Sung a thei lomi cu kan tlawmte lai tiah ka ruah. Aruang cu Hakha khualipi ah Chin Idol an rak tuah lioah teinak a cotu zong a si. Cun, Myanmar ram huap in tuahmi Myanmar Idol Season 4 ah myanmar huap in teinak a cotu zong a si fawn. Vawlei cung ramkip nih hlasak zuamnak an tuahmi (ngeihmi) ah Idol timi hi a nganbik khen a si. Cu bantuk i teinak a hmumi hi cu an thiam taktak ti khi a fiang.

Myanmar Idol season 4 winner a si hnuah kawl hla “Unseen” aa chuah. Azohtu hi 1million an tling cang. Cun, “Unseen” timi a hla cu Joox Myanmar ah a lar bik (top 1) a si. Joox cu Myanmar ram ah minung tambik nih an hmanmi music app asi. Joox Myanmar ah Top 1 si hi a har taktakmi a si. Tutan ah kan farnu Esther Dawt Chin Sung nih a tu bantukin top 1 a hmuh hi a sunglawi tuk hringhran.

“Unseen” top 1 a hmunak kong he pehtlai in Esther nih, “Bawipa kaa lawm! Kaa lawmh tuknak ah chim awk hmanh ka hngal lei lo. Nan dihlak cungah kaa lawm. Bawipa na vel hi ka caah a za ko. Joox Top (1) ngah ding tianginn UNSEEN ka hla a ka ngaih piak tu ram chung ram leng um dawtu nan dihlak cungah ka lawm. Nan dihlak Bawipa nih Thluachuah in pe dih ko hna seh,”tiah a lunglawmhnak a langhter.

“Unseen” a hla kongah biahalnak an tuah lioah a chimmi cu,“Ka nau le nih hi hla i lem an canning cu na thiam lo tuak an ka ti,” a ti.

“Hi ti deuh in na tuah awk a si tiah an ka ti len. Asinain mintami zong ka si lo, cu hlei ah Kawl hla lebang ahcun, a tu hi ka voikhat lemcan a si tikah, ka ning zong a zaak, asinain hibantukin tlamtlin lonak a um ko buin thazaang a ka pe i ka hla a ngaitu nan dihlak cungah kaa lawm.

“Cun, keimah te lawng ka sakmi hlathar (single song) zong kaa lim cang nain, Covid-19 ruangah MTV ah ka thlah kho rih lo. Ṭhenkhat nih MTV lo zongin chuah ko a ka timi an um len nain, MTV lo ahcun ka chuah duh rih lo,” tiah a chim.