Australia ramkangnak hmun ah a voikhatnak caah Chinmi zumtu Melbourne nichuahnak leiah a ummi Emmanuel Christian Church Melbourne (ECCM) khirhfabu chungtel 73 pawl in tlang rian ṭuannak, 22 February 20 ah an ngei. Tlang an ṭuannak hmun hi Bairnsdale timi hmun VIC i a kanghnak hmun pakhat ah a si.

“Australia rammi pawl nih dawtnak le zawnruahnak nganpi he kan nih Chinmi hna an ram i um dingin an kan cohlan i kan nih zong nih harsatnak an ton caan ah kan tikhawhtawk in bawm ve ding hi kan ṭuanvo le kan pek khawh vemi duhdawtnak a si. Culawng si loin an ram mipi hna nih an kan cohlan mi hi kan nih zong nih kan miphun an si ti i kan cohlannak, duhdawtnak le ṭuannak he kan langhter khawhnak a si.

Kan Bawipa Jesuh Khrih nih an cawnpiakmi, mi harsa le bawmherhmi caah bawmnak pek ding an kan cawnpiakmi kan ṭuan khawhnak le kan i teltum khawhnak a si ruangah tangka fangin bawmnak kan pek hleiah kanmah hrimhrim zong a takin kan kal khawhnak hi a si. Chinmi nih kan ngeihmi, midang bawm duhnak thinlung a tak hrimhrim in kan langhternak zong asi i, hmailei caan zongah peh zulh lengmang ding zong kan duh. ”tiin a tawlreltu, Pa Wesley Bawia, ECCM Chairman nih a chim.

Australia ram i mi harsa hna bawmtu Samaritan Purse hna he ṭuan ṭiin tawlrel mi a si. Meikangh ruangah inn le lo a kangmi hna an inn le lo thianhpiaknak in rianṭuannak an ngeih hi a si. Group 7 ah an i ṭhen i hmun 6 ah an ṭuan. “Midang bawm kho dingin Pathian i lam a kan hruai mi hi asunglawi tuk. Kan ti khawh tawk chuah in Khrihfabu hmin in hiti bantukin tlangrianṭuannak kan ngeih khawh hi a sunglawituk’ tiin Rev. David Zam, ECCCM Pastor zong nih a chim ve.

ECCM in meikanh bawmhnak caah $4039 an pek hna. Hi bawmnak hi Chin Community hmin in bawmhnak $60000 pek mi ah an thawh. ECCM cu Australia, Melbourne khuapi nichuah lei ah a ummi Chin (Falam) zumtu hna i pumkhawmhnak Khrihfabu asi. Kum 2007 i rak dirhmi asi i tu ah members chungtel 450 tluk an um.