Australia Rammisinak kongah Ralring le Fimkhur kan hau chin lengmang cang

Theihtlei

Australia Rammisinak kongah Ralring le Fimkhur kan hau chin lengmang cang

Image result for sang hre

Tulio cu Department of Immigration nih rammisinak (Citizenship) a sok mi paoh biatak tein kherhlainak an tuah cuahmah lio pi a si. Cu chungah Chin mi hrim cu ahlei in an mit kan la.

Kan mah Chinmi chungah rammisinak an sok mi cohlan lomi zong an um cang. Department of Immigration nih zumh lomi hrimhrim kan tam tuk. Cucaah, abuaktlai cun Chinmi cu ahlei in kherhlainak ramri (intense scrutiny) chung kan lut cuahmah cang. Mah hi November 2017 in ai thok. Minister of Home Affairs nih April, 2018 ah a kan chimh bantuk in June 2018 ah Chinram ah scout team (hlethlai tu phu) an thlah colh hna.

Cu hlethlainak a phichuak hna cu Chinram ah hmetpungtin, innthongsuh cazin tbk nan lak khawh dih. Kan sin ah a rak pe cia mi zong an tam pi ti hi Department nih an i tleih. Mah hmetpungtin le innthongsuh cazin a ap mi hna hi a deu le a tam fawn. Malaysia ah a deu in tuah ter mi a tam tuk ti hi upa nih kan theih.

Department sin ah nan rak chim, tial mi chung in a hman lo mi (discrepancy) tampi an hmuh caah kherhlai thannak (re-investigation) an tuah cuahmah.

Ralrin a herh tuk mi hna cu;

1. Na nu le pa silo na unau tbk India le Malaysia lei in na auh hna i avoikhatnak cohlan lo tik hna ah avoihnihnak ah mindang maw silo a chuah kum thlen in auh lo ding.

2. Nan nu nih a unau 202 sponsorship in a auh i an cohlan lo (reject) tikah nan pa unau ti
btk in auh than lo ding.

3. Miauhnak nan tuah tikah Laimi upa sin siloin Migrant Agent hmang hram hna uh. Tangka
tampi a dih ko nain a dih dongh tiang an in bomh khawh hna lai.

4. Australia an phaknak ding lawng tuak tan hlah. An phak hnu ah nangmah ca tiang thinphang le tihnung mi thil a si khah philh hrimhrim hlah.

5. Laimi upa le pastorte hna nan hman tik hna ah a hnu pi rammisinak a buaibai tikah an bomtu hna min tiang chimrel caan zong a phan than te kho. Cutikah, ai daw mi zong hi huat, ichonh duh ti lonak tiang a chuak kho.

6. Rammisinak na sok bak ah application form i a cungbik ah chiah mi Australian Citizenship
Act (2007) kha zei dah a si ti hlethlai hmasa peng. Ahman lo mi information na kan pek cun mah upadi ning in tazacuai le tuanvo kan lak lai ti a si kha philh lo ding.

7. Na unau, na chungkhat Malaysia le India a um mi nih kawhauhnak tuah cu an duh tuk ko
lai. Asinain, ning le cang tein tuah a herhnak kha philh hrim hlah. An mah duhnak in Australia ram a phan cang mi nangmah hunhimnak khi a biapi deuh ti kha philh hrimhrim hlah uh.

8. Australia ram in Kawlram siseh, US ram a si ah adang ram hna zong a herh ning in an
chonh biak dih hna. Mah hrimhrim i ralrin khun a hau.

Note:
Department nih hrokhrol an hmuh cang caah Community upa hna ca zong ah tawlrel piak le buaipi ding hi a har ngaingai. Asinain, kan i zuam cuahmah ko. A tha bik in kan i zuam cuahmah lio ah a chiabik kan ton ding zong i ruah chih a hau cang. Aluancia kum tampi kam duh paoh in kan rak cawlcangh mi cu kan zun cuahmah ko cang hih.

Credit: By- Sang Hre

Leave a Reply