Covid-19 ruangah Australia Cozah nih mibu cawlcanghnak fak ngaiin a kham lawng si loin nungak tlangval inn dangdang ah a ummi zng nan i lengkai lai lo ti a si. Hi ah hin nungak tlangval lawng hmanh si loin nuva a si ko cangmi inn dangdang ah a ummi nan si ahcun nan i vehvat lai lo, nan i leng lai lo ti tiang tein an chim cangmi a si.

Tutan zngah Jonathan David timi pa cu nungak a thli tein a len lengmangmi an theih caah Perth Biaceih zungpi nih a sual ko tiah biachahnak an tuahpiak i kumkhat chung thongthlak a si lo ahcun $50,000 liam seh tiah biachahnak an tuahpiak ti a si.

Jonathan David (kum 28) hi Victoria minung a si i, March 28,2020 ah khan Westher Australia a phanmi a si. Cozah lei nih khualtlawng le Lockdown kongah biatak tein phunglam (rule) an tuah lio a si caah ni (14) chung quarantine dingin Hotel ah ttuanvo ngeitu nih an chiah ve mi a si.

Asinain Jonathan David hi quarantine an chiah chungah a thli tein a chuak i a nungak sinah a va kal peng ti a si. Cu ahcun mizapi hmanmi Public transport zong a hmang peng ti a si. Jonathan David hi voikhat lawng hmanh si loin voi tampi a nungak nu sinah a thli tein a kal peng ti a si. Palik lei nih an lunghrinh hnu ah tha tein an ngiat, a room ah an zoh i a um lo, asinain a hnu minute 45 hnu ah a room ah cun a rak phan tthan ti a si.

CCTV record in a cawlcanghnak vialte cu an check dih tthan, cu tikah a thli tein zapi hmanmi elevator a hmannak, Public transport a hmannak zong an hmuh a thli tein voi tampi a darling nu sinah caa a va hman ta mi cu an hmuh. Cu ruangah palik nih biaceih zungah an chuahpi hi a si tiah Daily Mail nih a tarlangh. Laikokekjournal