Covid-19 zawtnak kilvennak le humhimnak rian a ṭuantu Covid-19 Falam Volunteer pawl cu kawlrampi ruahchan petu Daw Aung San Suu Kyi nih sunlawihnak roca a pek (kuat) hna tiah kan theih. A sunglawi tuk hringhran. Hi bantukin mipi caah zaanghleicawi in rian a ṭuantu hna cu atu bantukin sunlawihnak a pek hna hi a si.

Hi sunlawihnak roca cu Chiapa 30 ahkhan rak timtuah cangmi a si i Rampi Social Minister Dr. Win Myat Aye nih Tedim khua dirhmun zoh pah in a kal pah ah a kuat hna tiah kan theih. Volunteer minung (30) hna sinah pek a si cang i a tingco rih lomi zong an um tiah Volunteer lutlai Salai Nhgepi nih a chim.

Volunteer lutlai Salai Nhgepi nih a chimmi cu,”Volunteer pawl hi phu hnih ah ṭhen a si i a thar a rak lut ṭhanmi he an dihlak in minung (45) reng lo kan si cang. Volunteer training a kaimi hna sinah lawngah hi sunlawihnak coca cu a pek a si i, a dang a tang rihmi a hmu rih lomi hna zong hi sunlawihnak roca an hmuh khawhnak hnga kan tawlrel cuahmah lio a si,” tiah a chim.

Hi kong he pehtlai in Falam vuanthok bawi AD Pu Ca Awi nih a chimmi cu,”Rampi hruaitu bak nih minsen thut in sunglawihnak roca peekmi cu sunglawi deuh in kan peek hna lai. Kan volunteer hna an i pumpeknak zoh tikah a sunglawi taktak. Cucaah Covid-19 zawtnak boruak a kian deuh tikah sunglawi tein le ṭha tein lunglawmh biachimnak he kan tuah ṭhan lai,” tiah a chim. Chirchan: Falamonlinemedia