Aung La N Sang Nih Brandon Vera A Tei Ruangah Laimi Nih Aung La Le Khabib I Thong Hna Seh Ti Kan Chim Mi Cu Ningzak A Si

Aung La N Sang nih Brandon Vera a tei ruangah Laimi nih Aung La N Sang le Khabib Nurmagomedov kan tahchun mi hna hi cu kan ruahnak a rak te nau hrim ko. Amah Aung La N Sang nih peih UFC va thongh ding ahcun ka sih kho rih lo,”tiah fiang ko in a chim ko kha.

Ttha tein ruat hmanh, Aung La N Sang hi ka nautet ruang le ka thangchiat duh ruangah si loin thil umtu ning ka chim duhnak a si. One Champion zaangleknak hi Asia miphun hna lawng nih biatak tein sunghsak i uar mi a si. Asia ram a si lo mi hna nih cun cu tluk ngai cun an uar in thazaang an pe tuk lem lo. MMA le UFC ah hin UFC tu hi thazaang an pek deuh mi a si. Cun, a tutan ah Brandon Vera cu Aung La N Sang nih a vuntei tikah One Champion zaangleknak ah cun Aung La Nsang hi dirhmun sangbik le amah tei kho tu an um rih lo.

 

Hi kong he pehtlaiin UFC ah biatak tein a thong ngam ding cu Aung La N Sang lawnglawng hi a si. Cu ruangah Aung La Nsang cu UFC Lightweight Champion Khabib Nurmagomedov he i tong hna sehlaw a ttha lai tiah chim a hung si pah cang.

Asinain Aung La N Sang le Khabib Nurmagomedov hna an i ton khawhnak dingah cun Aung La N Sang hi a tlawmbik kumthum in kumli tel training a ngaih hmasa a hau. Mah hmanh ah khin a va tei kho hnga maw? Theih ding mi cu Aung La N Sang cu Middleweight lawng a si i, Khabib Nurmagomedov cu Lightweight a si. Cu pin ah an sining hrim khi tahchun awk an ttha hrim lo.

Naite i, Aung La N Sang le Brandon Vera an i thongh khawhnak hmanh kha Vera nih Aung La a co ruangah Vera nih a rihzan KG 10 bak te aa tthumh hnu lawngah an i thongh khawh mi a si. Cucaah Aung La N Sang nih Brandon Vera a tei ruangah Laimi nih UFC Lightweight Champion Khabib le Aung La N Sang i tong hna seh tiah kan chim len mi hi cu a si kho lotuk mi khi a si.

Ka chim cang bantukin amah Aung La N Sang hrim nih peih bia an hal lio ah UFC va thongh ding ahcun kei cu ka tlak rih lo pinah keimah zong nih kaa zum lo, tiah fiang ko in a chim ko kha. Aung La N Sang le Khabib hi cu tahchun ngam ding zong an si lo. UFC phunglam in i phomh hna sehlaw Aung La N Sang nih Brandon Vera hmanh kha a tei lai lo. Cucu an i dannak a si. Credit: Hrang Cuan