KAN RAM AH HOLHTHEIHLO POM NING PHUN 5: Tulio kan Laimi lakah hin holhtheihlo hi a pom mi le a pom lomi tiin phun hnih lawng kan um rua kan ti men lai. Phun nga kan rak um.

1. HOLHTHEIHLO A UM HRIMHRIM, ZUMTU NIHCUN KAN CO HRIMHRIM DING A SI

Laimi zumtu phun khat nak nihcun holhtheihlo hi a um hrimhrim. Pathian nih a kan peek rih hrimhrim. Holhtheihlo cu Thiang Thlarau nih a kan co termi a si an ti. Hi hna nih holhtheihlo hi an zumh lawng siloin, thla an cam ah holhtheihlo i thla an cam hlei ah, hla tiangin an sak. Mipi kha heh! tiah nu he pa he an rak rock cio. Crusade, khawmpi i hibantuk holhtheihlo hlasak le laam a um lo ahcun Thlarau a tla lo an ti i crusade le khuampi kha hlawhtling lomi ah an ruah. Paul nih a let tu an um lo ahcun biakin chung ahcun hmang hlah uh a timi zong kha an ngai lo. Holhtheihlo hlasak le holhtheihlo hlasak lio i laam cu baibal ah a um lo ti an theih ko nain a poi ah an chia lo. An i lehpalhmi Baibal lawng i a ummi a si ti kan chimh hna zongah an duh lo. Holhtheihlo hlasak le laam a um ti lai lo tihi a phangmi an si. Hi zumhnak le cawlcanghnak a zultu hi Lai Tlang Pentecostal kan saya te an si deuh ngawt.

2. HOLHTHEIHLO CU A UM KO NAIN KAN HERH LEM LO

Hi zumtu phun hnih nak hna cu Baibal biafang tthatein a dothlat mi an si lo caah Lai Baibal ah holhtheihlo ti a um ko caah holhtheihlo cu a um ko lai ti an zumh. Asinain an rem lo. A tingco mi hna zong an uar lem hna lo. Holhtheihlo i va holh theng a herh lo a timi an si. Hi zumhnak a zultu hi Baptist lei kan saya te an si deuh ngawt.

3. HOLHTHEIHLO CU A UM KO NAIN A DIH CANG

Hi zumtu phun thum nak hna nihcun zultu hna chan lio ahcun holhtheihlo hi a rak um ko. Asinain Baibal cauk ttial dih a si hnu cun holhtheihlo hi a dih cang. Prophet a dih cang. Pathian peekmi hngalhternak zong a dih cang an ti. 1 Kor. 13: 8-11 tiang kha an i chirhchanh. Prophet le hngalhnak hlan hmanh ah holhtheihlo a dih hmasa. Paul nih Korin cakuat a ttial hnu cun holhtheih lo zong a dih. Cucaah holhtheihlo cu Paul nih Korin cakuat i a ttial hnu cu holhtheihlo kong voi khat hmanh a chim ti lo tiah an zumh. Hi zumhnak a zultu hi Fundamental saya te an si deuh ngawt.

4. HOLHTHEIHLO A ZUM LO NAIN AI ZUMH TERMI

Hi phunli nak zumtu pawl hi holhtheihlo an pom lo nain a pommi ai lawh ter mi an si. Kan Khrihfabu member nih an ka rem sual lai lo ti an phan ruang le thawngttha chim an ka sawm sual ti lai lo ti phan ruang ah holhtheihlo a pom lo nain a pommi ai lawh termi an si.Hi zumhnak a kalpi mi hna cu midepde evangelist le midukdul pastor pawl an si.

5. HOLHTHEIHLO TIMI HI A UM IN A RAK UMMI A SI LO, HOLHTHEIHLO CU LIH A SI

Hi phun nga nak zumtu hna nihcun Greek Baibal biakam thar kha study an tuah i Thlarau Thiang thilpeek pakua lak ah pakhat a simi cu “glossa” a si i cucu “holh” tinak a si. Thiang Thlarau nih a peekmi cu holh a si. Dididdadadudud ticu holh a si lo an ti. Holh cu miphun pakhat nih a holhmi holh kha holh a si. Asinain anmah holh cun bia an rak chim khawh ko caah an thiam bal lomi holh in chim khawh nak kha Thlarau nih a rak peek hna. Cucaah cucu miphun dang holh a si. Cucaah holh dang in chimphuan khawhnak a rak peek hna tiin an zumh.

Asinain 1 Cor. 13: 8-11 tiang ah a tlingmi a phanh tik ahcun a tling lomi prophet biaphuannak, holh (holh dang) in holh khawhnak le hngalhnak hna cu an dong lai a ti bantukin Pathian nih minung hna sinah ai phuannak cu a maak i cu ai phuannak cu tlingtein ttial a si hnu, lam a kan hruaitu Baibal tling kan ngeih hnu cun prophet an um ti lo. Hngalh khawh nak zong a kan pe ti lo. Baibal lawngin hngalh khawh a si cang. Cun holh dang in holh khawh nak zong cu a dih ve cang tiah a pom mi an si. A buaipitu bik cu Aung Myint Thang a si.

Aung Myint Thang nihcun 1 Cor. 13: 8-11 tiang i “A tlingmi a rat tikah a dong lai” a timi khi Jesuh rat tik a si lo tiah a cawn piak. Zeicatiah 1 Kor. 12, 13, 14 cu Jesuh rat tthanak kong a kan chimtu Baibal cacang an si lo a ti. Hi Baibal cacang ahhin Paul nih, “Jesuh cu hmaitonh in ka hmuh tikah” ti zong a chim ko nain kha nih khan Jesuh ratnak kong kha a chimmi a si lo tiah Aung Myint Thang nihcun a zumh. Zeicatiah atu zongah Jesuh cu a ra rih lo nain Paul cu a thih cang caah Jesuh cu hmaitonh in a hmuh hrimhrim ko cang ti kha Aung Myint Thang nih a zumh ning cu a si.

Cucaah Aung Myint Thang nihcun “holhtheihlo cu a um in a um bak lomi khi kan Laimi le vawlei cung zumtu tampi nih an phuahchom i a chimrelmi” a si tiah a zumh. Aung Myint Thang nihcun Paul nih Greek in Baibal a rak ttialmi ah holhtheihlo timi biafang a hmuh lo caah a zum kho hrimhrim lo. Cucaah Aung Myint Thang nihcun holhtheihlo hi kan Lai Ram ah um hrimhrim hlah seh ti a duh. Khrihfabu hi kuai hna seh tihi ai tinhmi a si lo. Cucaah Aung Myint Thang nih holhtheihlo a dohmi hi a mawh bak lo.

Credit: Aung Myint Thang