Champion taisawm a put cuahmahmi Aung La Nsang nih naite ah De Ridder a tei lo hnu ah thawnglatu tampi nih biahalnak an ngeih. Thawngzamhtu Duwun Media 7 thawngzamhnak nih biahalnak an tuah. Cu i bia an halmi cu a tanglei ah ka rak taar.

Aung La Nsang nih cun,“Atu bantukin kan sung lai tiah ka zum ve loh. Keimah zong ka ngaihchia tuk ve. Asinain, minung timi cu ngaihchiat in um peng awk a si loh. Sungh timi cu ahopaoh nih ton khawhmi a si i hi nak in ṭhawn chinchin dingin ka zuam ve lai. Atu ahcun, ka ngandamnak zong a ṭha. Ka chungkhar zong an dam ṭhat ruangah ngaihchiat ding a um lo i zuam ding lawng a um.

“Puai hlan ah Covid-19 kan i cheknak ah kan hawikom lakah Covid-19 ngeimi an um i kan puai zong an let ṭhan dengmang. Cu tikah, thinlung a buai tikah kan puai ah thinlung pek a har tuk. Ka hawipa Martin a hun sungh ve cu lungthin a vaivuan chinchin. Tutan puai cu ka timh ning bantukin ka cawlcang khawh lo caah ka sunghnak pakhat a si. Jiu Jitsu ka cawn lonak hi kum 2 fai a si cang.

“Mithongh, chuih le vuak ning lawnglawng ka rak cawng. Tutan puai zong ka zoh lengmang tikah, a har tuk lem lai lo, ṭha tein ka zuam lai i ka tei lai tiah ka ruah. Atu cun, Brazil misual kuat Jiu Jitsu tiah kawhmi Jiu Jitsu ah Champion a simi he thla 2, 3 hrawng cawn kai tim. Tutan kan puai cu thongh dingin a ra lo i tlaih le reh dingin a rak rami a si. Tukum kum dongh hlanah voikhat tel cu i thongh ka duh tiah ka chim cang i, nawlngeitu nawl a si ti lai.

“December thla chungah puaikhat ka halmi hna a si i an ka pe lai maw, pe lai lo ti ka thei rih lo. Cu i an ka pek lo si le January le February ahcun puai cu ka ngei lai tiah ka ruah. Champion taisawm cu cuh le lakṭhan ka duh i a rem an ti lo si le ahodah ka thonghpi lai. One Championship in ka dinh tikah kan chungkhar in Myanmar ah kan tlung lai i ka thiamnak pawl Myanmar mipi ka chimcawnpiak hna lai. Light Heavyweight ahcun thawngpang zeihmanh a um rih lo i Middleweight Champion taisawm lak ṭhan ka duh. Anih cu mi thongh le vuak dingin a rami a si lo.

“Cucaah ka cawlcanghing ka thlen ai i Champion taisawm ka lak ṭhan lai tiah kai kam. Taisawm ka lak ṭhan hrimhrim lai. Tutan kan puai cu kan dihlak caah cawnpiaktu ṭha si hram seh! Keimah zong ka chambaunak le ka palhnak tampi a um i ka ngaithiam hram uh. A donghnak ah ka zuam chinchin lai i Middleweight taisawm hi ka lak ṭhan lai,”tiah Aung La Nsang nih cun a chim.