Aung La Nsang Bia Ruangah Kawlram Mipi An Buai: Myanmar nih World Champion kan i ngeih chun mi Aung La Nsang cu vawlei cung huap in champion a si pinah Myanmar mipi zong nih uarbik mi le ttenh taktak mi a si. Sinain nizan October ni 28 ah Rohingya konglam a chim mi ruangah Kawl mipi pawl an buai dih.

Kan theih bantukin Aung La Nsang cu Japan ah tuahmi One Championship Light Heavyweiht champion taisawm a humhim tthan hnu ah a umnak US ramah a kir tthan. Vera he an i thonghnak ah a kut a khawn ruangah surgery i tuah dingin Chicago Airport in South Dakota kal ding a si. Chicago Airport pawng i rawldawr pakhat ah a lut i, Rohingya pakhat he an i tong. Rohingya pa he an i tonnak kong cu hi tin a langhter.

Tuzing cu Chicago Airport ah ka um i, ja kut Surgery tuah dingin South Dakota ah kal ding ka si. Airport pawng i rawldawl ah ka lut i, rawl petu pa cu Myanmar a rak si i, Rohingya miphun a si. A hawipa he keimah an ka uarnak, kan ttenhnak kong le keimah ruangah an i uanthlarnak kong cu a ka chimh. Hi bantukin amah he kan i ton khawhmi cu ka ka lawm taktak. Hmailei a lamah lunglomhnak le hlawhtlinnak hmu hramseh tiin duhsaknak ka pek,”tiah a chim.

Aung La Nsang nih mah ti a chimmi bia ruangah Kawl Miphun hna cu thinhun in Myanmar ramchung ah Rohingya miphun an um lo, Zei ruangah dah Rohingya thangtthatnak biafang na hman? Bengali an si lo le Bangladesh miphun an si. Myanmar ramah Rohingya ti bantuk an um lo, Myanmar sinak zong nih kan pom kho i, hi bantuk biafang na hman ding zong a si lo, midang nih na bia hi an theih dih sual lai. Rohingya konglam hi chim ti lo dingin i ralring cang,”tiah Aung La cu biafak ngaiin an ti cio.

Kawl mipi nih Aung La cu faktuk in an tthuat tikah Aung La zong a um nuam lo i, Rohingya timi biafang a hman mi cu a hlonh tthan. Asinain mipi ttih ruangah Rohingya kong a chim mi cu a thlen tthan. Cu tikah Rohingya pawl cu an lungfak colh i, Biadik ttenh ngam lo le mipi ttihnak men ruangah zeica dah na ca ttialmi na thlen tthan? Na chim mi bia ah feh tein dir ko,” tiah Aung La cu an ti colh ve.