2023 Ah Paucan Dohthlennak Dawnkhantu Hna Part (3) Thimhnak maw a tuah lai? Uknak maw a tlaih rih lai: Rallokap minung hna nih Kaalung kut ah uknak ap loin uknak hi lak lawlaw ko tiah MAH an forh. Uknak na khumzual chung mi cu Uknak a lak an I ti caah tutan cu uknak hi lak lawlaw ko an ti nak hi asi. 2023 thimhnak ah NLD aa tel ahcun Rallokap party nih teinak a hmuh lai lo kha an thinphang caah asi.

NLD aa tel lo hmanh ah Rallokap party asilo mi nih TEINAK an hmuh sual lai tiah Rallokap minung hna nih an ti rih. Cucaah 2023 thimhnak tuah loin uknak lak lawlaw seh, MAH nih ti kha Rallokap minung hna chunmang asi. 2008 phunghrampi ning in uknak ka khumzual chung tiah MAH nih a ti nain, Uknak a lak lawlaw ah cun 2008 phunghrampi ning in asi ti lo caah, 2008 phunghrampi cu MAH nih a hrawk te lai, a thah te lai. 2008 phunghrampi thah loin uknak lak khawh le chut khawh asilo.

2008 phunghrampi cu MAH le Rallokap chunmang le saduhthah hlawhtlin tertu Baibol le an biakmi Khuazing bantuk asi. 2008 phunghrampi an siam nak hmun, Hmawbi, Rirangkung Hall cu Tuanbia lut Innpi si awk ah MAH nih a remh ter hna. Uknak an kan chut mi cu 2008 phunghrampi pohma phunphun in an kan lak hnawh, an kan hremhthat, an kan tlaih, kan innlo le khuaram mei in an duah mi vialte le an tuahserhnak vialte cu 2008 phunghrampi ning in asi tiah MAH nih a ti. Phunghrampi pohma tampi cu amah MAH tanbo le Soirawl ah amah tein a siam hna.

MAH te SAC le Rallokap nih cauk hringpi 2008 phunghrampi cauk hi Baibol le Vainam bantukin an I tlaih. Ralhrang Thang Sui nih Siamchuak mi 2008 Phunghrampi cu Rallokap le Rallokap Party (Rallokap Uniform a phawi cang mi Ralbawi rual) nih Rampi uknak tlaih zungzal le uktu si zungzal nak caah asi. Amah duh ning in thimhnak tuah, Ramkhel Party rual kha cawl khawh loin tuah in tlaihkhih, a dik fel lomi le tlukruan lonak tuah khawh nak asi.

Dikfel lo le dinfel lo ah a dih donghnak 2010 thimhnak in Bochuk Tin Sui hohak mi USDP cozah an kai. Sihmansehlaw, 2012 lakhruak thimhnak, 2015 thimhnak le 2020 thimhnak ah USDP an sung cikcek. Cucu MAH nih Fimnak le ralrinnak ah a hman cang. Cucaah 2008 phunghrampi cu Baibol le Pathian bantukin MAH nih a biak lawlaw cang. 2023 thimhnak zong dikfel nak le tlukruannak pelte hmanh um bak loin a tuah chih te lai.

Ningzak mualpho nak um lo bak tein a duh tuk hrinhran mi Tamada cu 2023 thimhnak in MAH nih a lak te lai. Uknak an kan chut I kum 2 leng an kan uk chung ah 2008 phunghrampi cu Mangkhawng le tanbo ah MAH nih a hman bantukin, 2023 thimhnak cu amah MAH Tamada si khawh nak caah Soirawl ah a hman te lai. By. Joseph R. Thang