Atu Hi Hakha Khua Ah Phone Line A Tlau Dih.

Chin News

Hakha Khua Ah Phone Line A Tlau Dih. Chin ramkulh Hakha khua ah phone line vialte a tlau dih tiah thawng theih a si.

November thla zarh donghnak thawk in Hakha khua ah Telenor line tlau hram aa thawk cang i nihin tiang a ngah ti lo leng ah MPT line zong December 10 thawk in tlau hram aa thawk hi a si.

“Nizaan in MPT line a tlau chap caah rian herh le adang dang um ah phone i chawnh khawh zong a si ti lo. Chinland Network wifi bel hi VPN kan thlen ahcun hman khawh fangfang a si” tiah Hakha khuami pakhat nih The Chinland Post ah a chim.

Kan hnu zarh chung zong ah MPT line chikhat a rak tlau bel cang nain a ngah ṭhan colh nain atu ah a van tlau ṭhan hi a si. Ref: The Chinland Post

Thawngpang dang: Kalay-Tedim Motor Lampi Cu Hman Khawh A Si Cang Tiah CDF CDM Siyin Nih An Thanh Nain An Phih Ṭhan Colh. CDF CDM Siyin nih an ukmi hmunram chung Kalay-Taingen-Tedim motor lampi le Chin ramkulh chaklei luhnak motor lampi cu zarh hnih tluk khar a si hnu ah December 9, zanlei thawk in hman khawh ṭhan a si cang, tiah CDF CDM Siyin nih an thanh nain tualchung mi bantukin ralkap aa chokvak mi an um pah ruang ah an khar ṭhan colh.

Kalay-Tedim motor lampi le Chin ramkulh chaklei luhnak motor lampi cu kahdohnak ruang ah November 27 ni thawk in CDF CDM Siyin nih a ni rikhiah um lo in an rak khar. December 9, ni thawk in hman khawh ṭhan a si cang tiah mizapi sin ah thanhnak an tuah hnu nihin December 10 ah phih ṭhan a sinak thawng an thanh ṭhan.

Tedim peng, Taingen khua SAC sakhan le Kalay-Hakha kar motor lampi cung SAC ralkap nih umhmun an khuarnak sakhan cu tualchung hriamtlai ṭangṭi phu nih an kah ruang ah kaphnih kar kahdohnak a fak ngai tawn. December 7 ni zong ah SAC ralkap le tualchung hriamtlai phu cu Taingen khua ah an kap i tualchung hriamtlai phu in ralkap cheukhat zong an rak i hliam, tiah theih a si.

Zarh hnih tluk Kalay kalnak lei motor lampi khar a si ruang ah tualchung mi hna cu eidin tirawl kong ah lungrethei ngaiin an um hna i mehhang cheukhat zong motorcycle in phurh a si pin ah datsi man kai lei an panh fawn caah thilman zong a kai ngaingai, tiah theih a si.

Leave a Reply