US Covid-19 Update: 04/07//2020: Coronavirus ruangah US ah a thimi, a zawmi a karh saling si. April 15 ah asang bikmi peak kan phan lai, mah ah khin a thimi an tam bik caan a si lai, mah dih hnu ah a thimi le a zawmi an zor chin lengmang cang lai tiah ruah a si. August thla ahcun zawtnak a thiang kho tiah zumh a si. England Vuancichuk Boris Johnson cu conronavirus in a zawt hnau zarh khat renglo deuh a si hnu ah a zual deuh i, sizung an phakpi i, Intensive Care ah an chiah i, Oxygen i a thaw an chuahter.

THE U.S. surgeon general Jerome Adams nih ABC’s Good Morning America” internview ah a chimmi cu tu thla dih ah hin US ramchung cheukhat ahcun kan on than khawh lai tiah a chim. Nizan white house i press conference an tuah lio ah August thla ni 4 tiang ah khin, a thimi dihlak minung 81,766 an phan kho tiah an ruahdamh. Tuchun tiangah a thimi, minung 10943 an phan. Nizan lawngah a thimi minung 1290 an i chap. Tlawmpal a kai deuh than. A zawmi 367650 an phan. Nizan lawngah a zawmi minung 29717 an i chap. A zawmi an kai deuh than. Tutiang ah zawtnak a chek cangmi hi 1.8 million an si cang. A dam than cangmi 19810 an si. Nizan lawgah a dam thanmi minung 2228 renglo an i chap ve. A dammi zong an karh chin lengmang ve.

Vawleicung ah zawtnak ngeimi tam bik cu US a si. A zual bikmi khua cu New York a si i, minung 4758 an thi. Nizan lawngah New York khua ah minung 599an thi. A thimi an hung zor deuh cang. New York hi a tha lei an pamh ciahmah. New York khua funeral inn pawl cu ruak lawng te nih a tlun hnawh lio caan a si. Khuaci an mui. Inchungkhar ning in a thimi tam dawh an si. New York caah biatak tein thlacam bawmh an herh.

Mizaw zohkhentu hna doctor le nurse pawl hi atu lio ahcun ralkap nak in bochan deuhmi an si. US mipi himnak caah ral a tumi an si. US rampi chung a zawmi i, 50% cu New York khuami an si. New York hi vawleicung khualtlawng a tam biknak khua a si caah a zual khunnak a si an ti. Covid-19 ruangah US ah rian ngei lomi million 13 renglo an si cang. Unemployment a sawkmi 6.6million an phan. A thimi tam bikmi ram cu Italy, pahnihnak ah Spain, pathumnak ah USA, palinak ah France a si. A rauh hlan ah US nih a lonh dih te hna lai tiah ruah a si. Credit: Salai Lairamthang