Ni khat hnu nikhat in coronavirus nih vawlei ah thihnak cu a chuahpi chin lengmang ko. Kan mithiam hna nih an i zum len ve ko nain a tu tiang ah cun a damhnak sii chuahkhawh taktakmi a um rih loh ti khawh a si. A sinain Khrih ah cun ruahchannak a um peng tthiam ko. Vawlei a teitu Khrih a ngeitu hna ti dahlo ah cun vawleimi caah hngangam awk a ttha hrimhrim lomi dirhmun ah kan dir.

Johns Hopkins University nih data an khawmhning in US ram cu nihin tiang ah coronavirus a tam biknak ram a si peng ko rih. A tu tiang ah US ramchung i zawtnak a ngei tiah hngalh khawh zat hi minung 500,000 renglo ah an si cang. A sinain hi COVID-19 ruang ah a thimi an tam biknak ram cu Italy a si. Italy ram ah hin coronavirus ruang ah a thimi minung 18,848 bak an tling cang ti a si. A changtu ah US an si i minung 18,679 an phan ve cang.

Italy le US a van changtu ah hin Spain le Germany ram hna an si. Johns Hopkins University nih an thanhning in Spain ah hin a thimi 16,000 renglo an phan cang. Germany ah hin 13,000 renglo an si ve cang tiah an chim. Cacawn ningani ah an thanh tthanmi lebang ah cun United States ah hin coronavirus positive hi minung 500,399 an tling cang ti a si. Cu chung ah a thihpi cangmi hi 2,108 renglo an si cang tiah an chim chih. US a van changtu ram hna ah Spain (158,00), Italy (147,000), Germany (122,000) le France (112,000) hna an si. India ah zawtnak a ngeimi hi 7,447 an si lio ah a thihpi cangmi hi 239 an phan ve cang. Ref: India Today