Kan Chin miphun le Vawlei nih a tawn cuahmah mi Zawtnak Caah thla a kan Cam piaktu kan Pastor pawl nan cung ah kan ni lawm!! Rianttuan lo in inn ah um caan a si caah CNF caah si seh, UCCF caah siseh a herh mi chimhawk ah kan Pastor hna le Biaknak le kan hruaitu pawl ka chawnh hna. A ho hmanh an phone an tlai lo. Zeidah an cang dih hnga tiah ka tuak. A cheu khat nih a hnu pi hnu ah khin an vun ka chawnh tthan. Thla ka camlio or thlacamnak kan tuah lio a si caah a si an ka ti. Aw biaknak lei kan hruaitu vialte thla an rak cam dih hi taa ti kaa vun i fiang.

Tam pi cu an aw a chung ah a pil dih, rawlei ulh (fasting) ni tamnawn an tuah cang caah a si lai ti kaa fiang cawlh. Nan dam maw tiah kan chawnh ta bia hna si tiah ka ti hna i, a tawi khawhnak in ka chawnh hna. A hnu ah i chawnh tthan te ding in ka ti hna. Aw! mah tluk vawlei pi nih hartuk faktuk kan tawn mi ttihnung ral nganpi lak ah hin Pathian sin ah rawl zong ei lo, zan zong ih lo, dinh lo in thlacam piak tu kan Pastor hna le Biaknak lei hruaitu ttha kan ngei hna mu ka ti i ka hna a ngam, kaa nuam. An cung ah kaa lawm.

A tu lio i COVID-19 kan tawn minih khua tamtuk a ka ruah ter. Midang cung ah dawtnak le zangfahnak a vun zawr ning, minung mah zawn lawng aa ruat mi kan sinak kan kokek (human nature) kha a lang tluahmah. Meithal dawr (Gun Store) tampi ah meithal le zanthawng (ammunition) dih viar in an cawk. Mah nih cun Pakhat le pakhat i zumhnak a tlawm cang ning a vun langh ter. Movie kan rak zoh tawnmi “Titanic” i, an tilawng pi ti chung ah pil aa tim lio i midang cung ah dawtnak a vun loh dih ning, mah luatnak lawng vun i ruah cio a si ning kha ka mit thlam ah a cuang.

Chin miphun Jesus Khrih zumtu Khrihfa vialte nih a tu bantuk ah hin zumtu fa kan si nak hi fek te in langhter dih ko uh si tiah kan sawm hna. Kan Pastor le Biaknak le hruaitu lawng si loin Chin miphun zumtu vialte fekte in kan dir caan, Chinmi vialte kan ni dawt chin chin caan, sia kan ni herh chin chin caan, zumtu fa kan sinak kan langhter caan, thla kan ni caam piak can a si. Sui khi a sit (adik tak) a si le si lo cu meikhangh nak in theih a si tiah Bible ah kan hmuh ban tuk in Miphun daw tu kan si nak, Khrih zumtu kan si nak tak tak kan langh ter caan a phan.

Kan pawngkam le kan velchum ah minung a thawng, a sang in a that cuahmah mi a si caah minung sinak cun a tthih lo mi kan um lai lo. A ngan le a fat belte aa dang lai. History ah kan rak cawn ko nain tthate in kan rak tuak bal lo mi 14th Century ah Bubonic Plague (Black Death) Europe, Asia le Africa ah a rak tlun lio i, minungMillion (50) leng an rak thih mi te hna kha zeitluk in dah an van a rak san i, a rei a rak theih hnga ti mi a ka ruah ter. A tu lio hi vawlei mi vialte nih zeidah kan tuah awk a si timi tuak cio lo awk a ttha lo. Mei a kangh ah cun a hmihnak ah ti kan ni lak awk a si i, ral a rat ah cun a khamnak ah meithal kan ni lak ve ding a si.

Cu ve bantuk in, hi si a um rih lo mi COVID-19 khamhkhawh, teikhawhnak ah kan biakmi Pathian sin thlacam nak he kan Chin Pastor pawl nih hmai an kan nawr pi mi hi lamdik a si. Kan Pastor hna cung ah kan ni lawm, Biaknak lei ka hruaitu vialte sin ah kan ni lawm, kan Biakmi kan Pathian sin ah kan ni lawm. Chin miphun vialte nih kan Bible cauk Salm 91 kha rel uh silaw, hi zawtnak hin Chin miphun vialte nunnak a himnak hnga caah siseh, hi vawlei ah hin hi zawtnak hi a rannak in a thiannak hnga caah siseh,thlacam dih cio ko hna uh sih.
Nan hawi,
Daniel Sakhong
Indianapolis

(Thawngttha: Kan Chin miphun chung zong ah hi zawtnak hin a zaw mi an um len nain tthate in an dam tthan ngawt cang i, pakhat hna cu nizan khan a rian tthawngngai in a va ttuan tthan cang) Laknak: Daniel Sakhong