Al-Qaida Hruaitu Osama Bin Laden Fapa Hamza Bin Laden Thah A Si

Al-Qaida hruai an thah mi Osama bin Laden fapa, cu atu lio al-Qaida hruaitu dingah ruah mi Hamza bin Laden cu vawlei cung media kip nih thah a si nak kong cu an langhter cio, a thihnak kong he pehtlaiin US aa tel tiah ruah a si. Sinain Defense Dept le President Trump nih hi kongah zeihmanh an chim duh lo. Khawi ka hmun ah dah, khua zei ramah dah thah a si timi zong fiang tein chim chih si lo. Sianin mah kong hi bochan taktak mi US official pahnih nih an chim tiah theih a si.

Hamza bin Laden hi Pakistan, Syria ah maw Iran ah hrawngah thah a si lai tiah zumh a si i, FBI lei nih a lu man ah a pa luman nak niam deuh in phaisa an thap mi a si. A pa Osama bin Laden hi a luman ah US$ 25 million thap a rak si. Hamza bin Laden nih hin kum 2018 khan nawlngaihnak a lak hnu in a chuahnak ram Saudi Arabia doh an timhnak kong cu a thanh colh.

May 2, 2011 ah Osama bin Laden hi US Navy SEALS Team Six hna nih Pakistan-ah an thah mi sinain Pakistan nih cun Pakistan ah a um lo tiah an rak i pheh peng. Sinain naite Pakistan PM Imran Khan, US a tlawn ah khan Pakistan Inteligence Agency hna nih an theih, an theih bantukin le US he hmunkhat ah rianttuan ti kan si pin ah hawmkom ttha zong kan si caah US hi biathli chimh a si tiah amah kawmtu Fox News sinah a chim. Mah hi Pakistan cozah nih Osama bin Laden hi Pakistan ah aa thup/dawr ko timi a voikhatnak an phuan hi si.

9/11 lio i tukdohnak ruangah US mipi 3,000 leng thihnak konglam an halmi ah PM Khan nih cun “US nih war on terrorism-ralhrang pawl a doh hna hnu in Pakistan ah minung 70,000 tluk nunnak a liam cang,”tiah a leh hna.