Aizelaw Khah! Zawngkengpa Ka Timi Kha David Lah Ka Ti Duhnak A Si Lo A Ti Ve Hoi Cang Ai

Chin News

Rev. David Lah cu Covid-19 zawtnak chungah mibu pumhtonnak tuah lo dingin nawl an chuahmi a zulh lo, phung a buar tiah an ti ruangah taza an cuai i thong an thlakmi. Hi kongah Laimi nih kan ibochan ngaimi a simi Dr. Ngun Cung Lian nih comment a pek ve len. Cu i pek a pekmi chungin mipi nih an caihhmai ngaimi cu Zawngkhengpa tiah comment a pekmi a si.

Zawngkhengpa timi comment a peknak kong he pehtlai in nizaan ah CMpage nih online biaruahnak an ngeihnak ah zeimawzat thil sining a chim i a fiang ngaingai. Biahaltu pa nih “Saya David Lah kha zeiruangah Zawngkhengpa na tiin comment na pek, na hmuhning na kan chim kho hnga,?” tiah biahalnak a tuah.

A tawinak in kan von langhter lai. Dr. Ngun Cung Lian, “ Atu tiang David Lah khi a sual tiah kan chim kho lo. Zeiruangah kan ti ah cun Biaceih zung nih na sual tiah an ti rih loh. Acozah nih na sual ko tiah sual an phawtmi menmen lawng khi a si pakhat. Mah an phawtmi cu zeidah a si ti a si ah cun, atu bantukin Covid-19 zawtnak hna a um tikah, mitampi i pum hlah uh timi ruangah na sual an ti pakhat.

“Mitampi nih an theih lomi cu a pahnihnak ah, David Lah nih hin, kawlram a ummi upadi zeidah a chuphoh nan thei loh, kan theih lo. A pathumnak ah, Davih Lah timi pa hi Kawlram ah Canada Citizen a laak hnuah zei bantuk Citizenship in dah a rak kir ṭhan timi zong nan thei loh, kan theih lo. A palinak ah, Keimah Kawlram 2013 ka rak kir hnuah nihin ni tiangah Tax ka pek, income tax ka pek. David Lah hi income tax a pe maw pe lo zong nan theih lo.

“A panganak ah, mah pah hi Regious Visa (Biaknak leiin Kawlram ah nan rak duh ahcun thlathum lawng a ngah) mah visa in maw a rat, business visa in maw a rat, a dang visa in maw a rat mah vialte khi a tam tuk. Cu tikah, Laimi nih kan ruahmi cu Khrihfa pa a si ruangah an tlaih, Pathian bia a chim ruangah an tlaih ti menmen in khin kan ruah. Law cu law a si, biaknak cu biaknak a si. Mah kha kan fian lo ruangah, zawngkeng ka timi hna cu David Lah kha a si loh. David Lah a uar tuk le Upadi zeihmanh a thei lo i, aṭial lengmangmi pawl kha zawngkeng tiah ka ti duh hnanak si. Zeihmanh an thei lo cun dai tein um ko.

“David Lah hi a hmuh panga a ngei, ngeih khawh ding minung a si. Asinain atu ah pakhat lawng a ngei rih. A karlakah David Lah kongah biaknak lei khrihfa le bhudahpata karlakah buainak a chuak sual lai tiah, zeidah kan tuah timi zong khi a caan zat tikah kan chimte lai. Asinain atu cu chim awk a ṭha rih loh. A pahnihnak, acozah lei nawlngeitu zong ka theihmi hna tampi an um. Mah pawl zong ka chimh hna, mah bantuk hi nan tuah a si ahcun Khrihfa le bhudahpata karlakah ihuatnak a chuah lai caah a ṭha lo ee tiah ka chimh hna. David Lah i a sining pawl zong khi pawl khi ka theihmi minung an si. Cutikah umharphen i, David Lah phungchim an tlaih, thong an tlak, cikcin an khih ti menmen in khin holh hlah uh. Mah hi upadi kong si. Upadi kong nan theih lo a si ahcun dai tein um ko uh mah kha ka chim duhmi si. David Lah ka hua lo, ka dawt lo.

“A pahnihnak ah ka chim duhmi cu, David Lah cungah ka lung a tling lomi a cheu a um. A pakhatnak ah, bia a chim tikah emotion a tamtuk in bia a chim. Tachunnak ah, Lailengpi Airport kongah phung a chimmi ka hmuh, ka nih bak a chuak,” tiah biahalnak an tuahnak a chim.

Note: A chimmi a tampi nih nain a sau deuh caah hi vial lawng hi kan rak langhter.

Leave a Reply