Caṭialtu: Salai Lungthli Tum

Hakha tah lio ah khualipi thial a timhtu kha aho dah a si? 2015 July dih ah Hakha vawlei a cimh i khuami vansang in kan um kha kan philh rih lai lo dah. Falam nupa, Thantlang nupa le khuadang tampi nih an si khawh chung in bawmhnak an kan pek. Kan rak i lawm cio.

Nain, No Than Kap a minung MP Pu Con Kheng nih cun Hakha aihramnak mitthli kha caan tha ah ai lak riangmang i August 4, 2015 ah Pu Thein Sein cozah sin ah Hakha khualipi cu Falam peng ah thial ding ca a tial diam ko.

Falam khua nulepa nih Pu Con Kheng cawlcanghnak an doh colh, Falam nulepa kan i tel lo tiah statement an chuah. Chin miphun lakah nupa bik an sinak lungput an rak langhter, uar an um tuk. Zapi kan i lawm.

MP Pu Con Kheng cu Chin Progressive Party(CPP) in 2010 thimnak ah MP a tlingmi a si. CPP chairman cu Pu No Than Kap a si. Chinram capital Hakha a si ruang ah a lungfak tuk i huatnak cauk tiang a chuahtu cu No Than Kap a si.

MP Con Kheng cawlcanghnak a hnuphen ah lutlai bik mastermind cu aho dah a si hnga? MP hmanh a tling vemi mifim pakhat nih chairman theihpi nak um loin hibantuk tihnungmi cakuat a tial ngam lai maw? A forhtu ahodah a si hnga? Cafir lo tein tanghnih na awn ko ahcun na tuaktan khawh ko lai ka zumh.