BAWIPA SALTHA DAVID LAH CAAH THLACAM BAWMHNAK: Saya David Lah hi Pathian nih kan Kawlram caah le a bikin mino thanghnak caah a hmanmi a si. Monica nu (Rev. Sarah Ngun Doi Fam) Bawipa nih a kawh auh i, rian chuah tak in Bawipa riantuan a tha lai maw tiah lung awtawm ngaiin a um lioah David Lah nih tampi ruahnak le thazaang a rak kan pek. Mitha le mi nunsiang ngaingai a si.

Live in thawngtha an chim i, Coronavirus ruangah a hawile pawl he quanrantine an chiah. Atu hi Cozah nawl buar in mipi na pumh hna tiah a voikhatnak biaceih zungah an chuahpi i Insein thongah ni 15 thong thlak chung ding a si tiah (DVB TV News)nih a tial. Mah hnu ah zeitindah a kong ceih than a si te lai? Atu ah Bawipa thawngtha a chim ruangah hi bantukin thil cincik in khih in zapi hmai ah hruai le thong an thlak tikah minung lei ruahnak cun ngeih a chiak tuk. Hi thil hi David Lak nih a ton lawng si loin Kawl ram zumtu vialte hna nih kan tonmi a si tiah ka ruah. Sihmanhselaw Bawipa sunparnak tu ah si hram ko seh!

Paul le Jesuh Khrih zultu vialte hna kha zei sualnak zong an tuah lo nain, Thawngtha ruangah thongtlak hrem le lung chek le thlah an rak tong. Cu bantukin harsatnak le thahnak an tong cuahmah ko nain zumtu hna an karh chin lengmang i atu kan nih vialte zong an thaipar ah kan hung cang. Anmah an rak tem tuarnak hrimhmui cu nihin zumtu hna nih khuaitizu bang kan dawpmi a si.

Josep temturnak le thongtlaknak cu a unau le a pa caaah mangtam luatnak a si bantukin kan hawitha David Lah temtuarnak le thongtlaknak zong thlarau mangtam a tuarmi hna luatnak ah Bawipa nih canter hram ko seh! Thlacamnak in rak bawm cio hna usih. Bawipa nih umpi selaw, lam hruai ko seh. Credit: Abraham Sang Nawl