Hi ca te hi june, 2017 ah ka rak tial cangmi a si hun rel than tik ah kha lio nak in atu ahhin a herh deuh chinchin. “Nupa sualnak na tuah lai lo” tiah kan fanu le fapa cawnpiak ngam a herh cang! Nihin ah, “Thla 5 Chung ah Yangon ramtthen in tlaihhrem case 117 a phan” thawng kan theih. A mak ko; a tam ngaingai! Ram pakhat ah, social media internet le online in pehtlaihnak phunphun hmanhram thok kaa ahhin, tlaihhrem hi a karh peng. Tahchunhnak ah, India ram I tlaihhrem a karh le social media/mobile/internet pawl biatak tein hman hram an thok Caan aa zul bak! A ruang a um.

 

Mikip nih hor-duh-cuainak hmanthlak le video phunphun an zoh khawh cang tik ah, an lung nih zeizongte a hngalh, an zer, sual ve le tuah ve nak caan rem an kawl i tlaihhrem in an vaak! Tlaihrem a tam tik ah, khat le khat i thahnak a karh ve. Cu pawl cu kan ton chin thluahmah cang lai. Hi pawl hi ram pakhat nih tthancho an hun thokkaa hrawng ah an ton cio tawnmi zatlang buainak an si. Hi dirhmun hin, kan tthangcho te rih lai i nu le pa i tlaihrem len hau lem loin lenglang, hmaihngal le duhtawk in nupa sualnak tuah ngamh Chan zong kan phan te lai.

Nupa sualnak cu, Rawl ei bantuk ah mino nih an ruah te lai. Naite ah, 2017 nikhat chung nu ihpi tam bikmi thimnak an tuah i PA pakhat nih nikhat ah nu 57 a ihpi khawh caah mintthatnak laksawng an pek khah! Minung phung zong a si ti maw, mah cu? Aaaaa, ram thangcho le ram fim timi hna nih ningcang tein khuaruanak pei an thlau dih cang hi! Nupa sualnak tuah hi kan miphunpi hrimhrim nih sual le ningzak thil ah kan ruah ti lo caan a phan te lai. Atu kan ton cuahmahmi tlaihrem chan ahhin cun, nupa sualnak cu ningzak thil le sual ah ruah khawh rih a si.

Sihmanhsehlaw kan phanh te laimi chan ahcun, sual le ningzak thil ah ruah khawh ti lonak lungput kan ngei te lai! “Nupa sualnak” timi biafang hi kan miphun nih fale sin ah chim lo phun, le hrial phun ah kan ruah; cucu thlen a hau cang. Kan fanu le kan fapa hna, a Caan a tlai tuk hlan ah, “nupa sualnak na tuah lai lo” tiah a min tein kan Cawnpiak hna ngam a hau cang! Thitumh hlan ah tuahmi poh cu “nupa sualnak” tiah auh a si.

Thitumh hnu ah tuahmi poh cu “nupa sinak” tiah thitumh hlan i tuah phun a si lo zia fiang tein kan cawnpiak hna a herh. Cucaah kan thih hnu ah cu bantuk chan chung i a rung lut te dingmi kan tefa hna lungthin ah, Pathian bia hram thukpi in kan phun lo ahcun kan miphun nih khrihfa nunphung kan thlau lai i Pathian zong kan thlau thai te ko lai! Nihin, kan tefa hna ruahnak le an lungput ah Pathian duhmi lungput, le Bawipa lawnhtertu lungput thlaici kan tuh a herh hringhran. Hi thil pakhat te lawng hi ruahchannak kan ngeihmi a si ko cang, tiah ka ruah. Credit: Pastor Hrambik Lian