Chinram caah thawngchia: Chin ramkulh Paletwa le Sami khuapi i palik zung cu AA nih November 4- 5- 6 ah kah an timh tiah thawng theih a si. Paletwa ah a um mi pakhat nih hi kong cu November 2 ah palik sin in kan theih, AA nih Paletwa palik zungah ca an rak tar tiin kan theih, palik zung pawngkam dawr i minung hna zong i ralrin dingin ca ahcun an tar tiah a chim.

Atu lio Paletwa dirhmun cu mipi kan lung rethei taktak, fiang tein chim ahcun ahcun zeitik caan paoh ah ralrin peng in um ding mi dirhmun ah kan um cang, a hleice in kawl miphun caah ko ahhin lung rethei le ttihnung takatk a si,”tiah a chim. Paletwa ahhin Chin, Rakhine le Kawl miphun cawhhrup in an um hna i, Hi kong he pehtlaiin Paletwa peng uktu cu pehtlaih a si i, ramkulh palik zungah hlathlai dingin chim le fial a si.

Hi kong he pehtlaiin Chin ramkulh sipin bawi U Soe Thet zong nih atu lio cu hi kawng lawngte hi theih le chim a si, AA nih Paletwa palik zung le Sami palik zung an kah lai lai timi thawng cu kannih zong nih kan thei, sinain ca tarmi cu hmuh a silo, mah kawng lawngte hi mipi nih an chim kan theih, kannih lei nih cun palik siseh, ralkap siseh an umnak hmunhma zong acozah sinah kan chim, tuah herhmi le tuah dingmi cu department nih an tuah lai” tiah a chim.

Paletwa palik zung hi khuapi chung bazaar pawngah a um. November 3 zaan zongah Paletwa i hrambunh 289 ralkap battalion umnak hmun cu hriamtlai pawl nih an kah tiah khuami pawl nih an chim thawng kan theih,”tiah a chim chih. Ref: Zalen