The Chin Post: Thih Dan An Pek Hna I An Thah Hna Hnuah A Zual Ding Ramchung Buainak Vialte Cu SAC Nih Ṭuanvo Lak Lai –MNDAA- TNLA AA! SAC ralkap nih thih dan a pek hna i, a thahmi hna Jimmy, Phyo ZeYa Thaw, Hla Myo Aung le Aung Thura Zaw hna he pehtlai in ṭangṭi phu thum nih July 27 ah cathanh an chuah. Thih dan an pek hna ruangah ramchung buainak a zual chinchin lai caah SAC nih nih a dihlak in ṭuanvo a lak lai, tiah ṭangṭi phu thum a si mi MNDAA- TNLA- AA nih July 27 ah an langhter.

SAC nih sualnak ngan a si lomi le ramkhel kong ah amah he lung aa khat lomi minung hna a thahmi hna hi mizapi kan thinhunnak le ramchung buainak a zualter lai, tiah cathanh an chuah. Cu pinah SAC minung pali an thahmi hna cungah ṭangṭi phu thum nih kan duh hrimhrim lo. Tantakmi chungkhar nan ngaihchiatnak kan i hrawm, tiah an langhter.

Thawngpang dang: Mon Ramkulh Hluttaw Luhnak Gate Security Hngak Palik In Bomb In An Cheh Hna, 2 An Thi. Mon ramkulh Hluttaw zung luhnak gate ah security a ngaktu palik hna cu July 27, zan Suimilam 6:30 hrawngah kut cheh bomb in kan cheh hna i palik pahnih an thi i pakhat hliam a tuar tiah Federal Freedom UG nih cathanh an chuah.

July 12 zongah Tatone khuapi TikKone veng um khuabawi zung ah bomb lunghnih kan hmanh. A si nain palhnak pakhatkhat ruangah SAC ralkap an phanh hlan deuh ah a puak i a tangmi pakhat zong cu SAC ralkap hna nih an luah tiah Federal freedom UG nih cathanh an chuah.