Johns Hopkins University Center for Systems Science and Engineering hna nih tuchun 20 April 2020 tiang coronavirus nih vawlei mipi zawtnak le thihnak a phurhning an langhter tthan. An chimning ah cun a tu tiang ah vawlei cung i hi zawtnak a ngeimi hi minung 2.3 million renglo an si cang. Cu chung ah minung 165,000 renglo nih mual an liampi cang tiah an thanh.

Vawleicung ramkip ah hi zawtnak hi a karh cuahmah peng ko rih. United States hi zawtnak a tam biknak hmun a si peng rih i cu chung zong ah New York City hi a zual khunnak hmun a si peng tthiamtthia ko. US ramchung ah hi zawtnak a ngeimi hi minung 746,000 renglo an phanh cang i minung 41,379 hrawng nih cun an thihpi cang lai tiah ruah a si.

Nitlaklei ram caan relnak in zanlei suimilam 4:30 tiang ah Europe ram pumpi ah hi zawtnak a ngeimi hi minung 1 million an phan cang tiah European Centre for Disease Prevention and Control hna nih an thanh. Johns Hopkins University hna nih an chimning in Spain ram hi US chimlo ah cun hi zawtnak a tam biknak ram an si. Hi zawtnak a ngeimi hi minung 195,944 an phan cang.

Spain changtu ah hin Italy an si. Italy ramchung ah hi zawtnak a ngei tiah theih khawhmi hi minung 178,872 an phan cang. A pathumnak ah cun France an si. France ah hin minung 152,996 bak nih zawtnak hi an ngeih ve cang. A palinak ah Germany an si i minung 144,387 an si ve. Cun a panganak ah United Kingdom hi an si hi zawtnak a ngeimi theihkhawhtawk hi minung 121,168 bak an phan tiah an chim. Ref: ABC News