A Tling Taktak: Dr. Ngun Cung Lian Nih Kum 22 Chung Miphun Caah A Rak Ipeknak Le A Ṭuanmi Vialte Kha Philh Piak Ding Hrim A Si Lo (Dr. Ngun Cung Lian Konglam Sining A Langhter Dih)

Hmuhning

Social Media ah Dr. Ngun Cung Lian hi fak tuk in amah pumpak/personality hnawrsuan in an phawmhmi ka hmuh tikah Chinmi hi kan mawh tuk ka ti. Hawile hna,

Andrew Ngun Cung Lian, SJD, Director of Federalism and ...

Dr. Ngun Cung Lian hi Chin mino caah role model a sinak tampi a um. Kum upa hnu ah sianginn kai aa thawh ve i, vawleicung fimnak ah a parpazik/ Ph.D tiang a phan. A zuammi hna caahcun fimnak le thlawhtlinnak cu aa ciasa a si ko timi hi Chin mino caah ṭhate in amah pumpak hrim in a langhter khawh tiah ka hmuh caah ka upat ngai. Zohchunh tlak pasal ṭha a si.

Kawlram ah a kir hlan vialte a riantunnak kha zoh ulaw, Chin forum siseh, CNF ah siseh, community ah a si ah, Chin miphun caah a caan le a fimnak tampi a pemi pa a si. Kum 22 chung miphun caah a rak ipeknak le a ṭuanmi vialte kha philh piak ding hrim a si lo tiah ka ruah.

CNF chuahtak in Kawl ralkap he rian a ṭuan tikah Kawlram caah a fimnak tampi a hmang kho lai. Amah pumpak le chungkhar ca zong ah hlawknak a um lai tiah ka ruah. Cucaah, keicu ka lawmpi ngai ko.

Kawlram milu 60 millions lakah kanmah Chinmi pakhat dirhmun in top level ah rian a tuan kho ve tikah ka lawmhpi ngai. Cun, rian sangmi a ṭuanmi a si ko nain, aa uah lo. Cucaah, Chinmi zapi/zaran lakah aa bual ve i, amah hmuhning le ruahning, pomning tete comments a ṭial ve tawnmi hi keicu a ṭha tuk ka ti.

A ruahning le kan ruah ning aa khat lomi tampi a um lai. A pomning le kan pomning aa khat lomi zong tampi a um lai. Cucu mining phung a si.

Dr. Ngun Cung Lian hi nupi le fa ngei, unau a ngei. Dawtu hawikom tampi a ngei ve. A hmuhning le a ruahning kan pawm lo ruang ah amah pumpak/personlity tiang fak tuk in kan hnawrsuan ahcun amah lawng siloin amah dawtu tampi an thinlung kan fahter kho hna. Cucaah, comments kan ṭial tik ahhin pumpak/personality itinak cu hrial cio hna usihlaw- topics cung tu ah kan ruahning le kan hmuhning cio hi ṭhate in chim khawh izuam cio hna usih. Credit: Zasang Cinzah

Admin leiin theihternak: Hi cabia hi a ṭialtu Zasang Cinzah a si. Asinain tlangtaar hi amah nih a taarmi si loin cathlahtu/thawngzamhtu lei nih a remcanning in kan taarmi a si ti hi mipi theihter kan duh hna. Caṭialtu zong nih nan kan theihthiamnak kan nawlpat duh fawn.

Leave a Reply