Atu lio thawngpang kong ah kan i ralrin a herh ko nain thinphang thlalau tuk in um hna hlah usih. A zawmi, a thimi tampi lakah a dammi zong an tampi ve. Cun kan biakmi Pathian nih hi virus hi a onhmi a si. Amah nih a theih, a hngalh ko. Pathian sermi vawlei ah Pathian hngalhpi loin a cangmi thil zeihmanh hmanh a um lo. Amah nawlngeihnak tel loin pithlung pakhat hmanh vawlei ah an tlong lo (Matt. 10:30). Pathian hngalhpi lo mi virus pakhat hmanh ah an um lo.

Hi virus cung ah nawlngeitu hi Bawipa a si. Thlichia le tilet hmanh nih a nawl an ngaih (Mark 4:41). A thuk bikmi muihnak horkuang chung kan um caan zong ah kan tuukhal ṭha Bawipa nih a kan umpi zungzal (Ps. 23). Amah i bochan hna usih. Thlacam hna usih. Amah sin kan kir khawh ṭhan nakhnga harnak hi Bawipa nih a tlunter ṭheu tawn. Cun Tuluk ram hna cu a dai ngai cang i company le sianginn zong an on ṭhan cang tiah thawng kan theih. Kannih lei zong a dai ṭhan ve ko lai. Hiti ning cun kan si peng lai lo. Kan ṭha ve te ko lai.

“Na pawng ah mi 1,000 an thi ko lai, na velchum ah thong hra zong an thi ko lai, sihmanhsehlaw nang cu zeihmanh nih an tawng lai lo. na kalnak kip i nangmah zohkhenhtu dingah Pathian nih a vancungmi kha a chiah hna lai. An kut in an in dawmh lai i lung ah na ke kha naa khawng lai lo. Chiandeuh le rul kha na lamh hna lai, chiandeih ṭih nungnung le rul sivai ṭhawngṭhawng kha na lamh chih hna lai.” Psalm 91:7-13 Credit: Van Neih Bik