A sunglawi tuk hringhran: Rev. Dr. Bishop No Chum te nih mi harsa Blanket zun thongkhat (1000) bamwhnak an pek hna
BAWPA KA LAWM. Ni khat hnu Ni khat, kum khat hnu kum khat dong cat loin thluachuahnak na ka pek i thlarau lam ka khual tlawn pah in miharsa hna sinah ei le din, sii le ai, chaw le va, hni le puan na thluachuah phaw le Zam kho dingin thluachuah na ka pek caah ka nunnak in a chuak vemi thangṭhatnak le upatnak vialte na sin phan koseh. Amen.
A Nungun Raithawinak ah ka co hlan piak ko. A liam cia 2017 kum ah hmunkip i um harsatnak a tongmi hna sinah Blanket zun thongkhat (1000) kan rak pek le kan phawt hna. kum 2020-2021 kumcu Covid-19 pulrai ruangah vawlei pumpi harsatnak kan tong.
2021 kumthar kan hunphan i, kan pawngkam ummi miharsa hna sinah Blanket zun thongkhat (1000) peṭhan kho dingin Na thluachuah nak kan hmuh ṭhan caah Bawipa na cungah kan i lawm tuk. 2021 kum thar thla hmasabik January thla a dih hlanah kan rianṭuantu hna hmangin pawngkam miharsa hna sinah Blanket zun thongkhat (1000) pek chuah a si ṭhan lai.
Yangon khuapi, North Dagon Myothit ka rak phakka, kum 1994-1990 kum lio hrawngah ka hawikom hlun a rak simi hna (1) Leilet pa U Myint Thein, (2) Caw zuatu pa U Myint Oo le (3) Inn siithuh thiam, Mr. Bin Laden tiah ka auhmi, U Aa Mat hna zong tuchun ah an inn le an lo cio ah Blanket pakhat cio laksawng ka va pekhna. An i lawm tukning ka hmuh tik ah kei zong an ka lawmhter tuk hringhran.
Genesis 32:10 “Bawipa, Na sal ka cung i na zaangfahnak le zumhawktlak na sinak na langhtermi hi a hmu dingah aa tlakmi ka si lo. Jordan tiva kha ka ṭhiangṭhut he lawng ka rak tan, sihmanhsehlaw atu cu hi bu bu hnih hna he hin ka ra kir”. Source:Rev. Dr. Bishop No Chhum
Thawngpang dan rak rel chih:Hakha Medical Insurance Of Charity Kong He Pehtlai in Mizapi Sin Fianternak. Hakha Medical Insurance of Charity cu Zar Ni nih a tuahmi si. A min hi Kawl min a si nain Laimi a si. “Ni 1 ah tangka thong 30 cio kan pek hna lai i zaangfah tein khuate lei ah Medical Insurance zuar ka bawm uh” tiin a kan fial. A kan hlen lai ti kan ruah lo ca ah kan cohlan ve.
2020 October 14 ah amah Zar Ni le Medical Insurance zuar a fialmi minung 4 cu Surkhua ah kan kal. 2020 October 18 tiang kan caam. Ni 4 kan caam chungah Lungkhin, Lungrang, Aikaa le Phaipha, tbk. ah a lang in kan va kal. October 18 ah Hakha kan kir.
Minung 4 a sawm chap hna i rian a fialmi dihlak minung 8 kan si. October 19 ah phu 2 in kan i ṭhen i Hakha peng le Thantlang peng ah Zar Ni tuahmi medical insurance cu kan zuar. Khuate kan tlawn hi October 14 in November 20 tiang a si. 2020 November 20 zaan ah zuar man thahlawh pek dingin a kan auh nain amah a chuak lo. Zaan suimilaam 7:00 ah ton ding a si nain kan chawn kho ti lo. A chungkhat le a um tawnnak hmunkip ah kan kawl nain kan hmu kho ti lo.
Kan si khawh tawk in zarh 1 chung chun he zaan he khuadei tiang kan kawl. Hakha sangmi sin zongah bawmh kan hal hna. Thantlang Mino Bu (Thantlang Youth Association – TYA) sin zongah bawmh kan hal. 2020 November 25 zaan suimilaam 12:05 ah Hakhathar luhnnak lam ah motorcycle aa citmi an hmuh, Tita zongah 2020 November 28 zaan deilei ah an hmuh nain kan tlai kho lo. Kan tlawnnak khuate 51 nih medical insurance cu an cawk (member an lut). Khua 5 cazin cu aa tlaupi. A taangmi khua 46 in a cawmi milu le tangka an pekmi kan tuak tikah ting 100 le ting 5 le thong 2 (10,502,000) a si. Phaisa cu a dihlak in aa tlaupi dih.
Medical Insurance zuar a kan fialmi minung 8 zong cu thahlawh tling tein hohmanh a kan pe lo. A kan pek lomi dihlak hi ting 30 leng a si pinah, kan hawinu (medical insurance zuar a fialmi lakah aa tel vemi) zong aṭu in tangka ting 5 a cawi ter i a cham ti lo. Kan hawinu zong a lungrethei tuk.
Mizpi Nawlnak-Medical insurance zuar a fialmi kanmah hi mizapi hlen duh in khuakip ah kan ratmi a si hrim lo. Kanmah tein motorcycle kan i damh i datsi kan i rawn dih ca ah thahlawh a kan pekmi zong hi a phu leemlo nain mifel ah kan ruah ca ah miphun ca ah rianṭuan a si ko tiin zuar kan bawmhmi asi.
Medical insurance zuar bawmh dingin a kan fial lio ahhin Hakha Post media ah a cawngia (fakthanh) mi a kan piah pinah Malaysia zongah ka pehtlaihmi an um tiin phone number +60 182 879 472 a kan pek. Phone number cu kan chawnh tikah “kan bawmhmi a si ko” an ti. Hakha ah inn a hlanmi zong a kan hmuhter ca ah kan zumhmi a si.
Kan hawile khua kan tlawnnak ah kan hawile mithmai zoh in khuami tampi zong nih nan cawk ca ah a kan bawmtu kan hawile zong nih na kan theihthiam naklai kan in nawl hna.
A kan hlen hrim tiah thinhun loin zuar a fialmi minung 8 zong a hlen ve hna, thahlawh zong a pe hna lo tiin na kan theihthiamnak lai kan in nawl hna. Thahlawh a kan hlenmi hi minung 1 ah ting 3 le ting 6 kar cio a si.
Zar Ni nih a kan hlen in a kan tlau tak hnu ah, a konglam kan hlat i, Malaysia zongah Laimi tampi a rak hlen hna i mi tangka le thilri zong a fir, ti kan theih.A nu hi Malaysia ah a um. Amah cu Hakha a pilepu sinah a um. A pilepu cu Dawrthar – Taung Za Let sangah an um.
A nu kan chawnh i Hakha a umnak a pilepu zong kan len hna, i “phaisa aa tlaupi mi hi medical insurance a cawtu pawl khirh ṭhan hna uh” tiin kan chimh hna nain “ṭuanvo kan lak duh lo cu a si lo, kan sining nih a pek lo tuk ruangah a si. Nanmah nih nan duhning in tawlrel ko uh” tiin a kan leh. Phung ning in pehzulh peng kan i zuam ko lai.