Thantlang khua ah tuahmi voi 72nak Chin Miphun Ni ah Kawlrampi ruahnakpetu Daw Aung Sang Suu Kyi cu Chin Miphun Ni a hmang ve i cu khawh cun Daw Khin Gyi Foundation nih Tikir khua ah Chin ralzaam a rak i ṭhial chap dingmi hna caah umnak inn Daw Khin Kyi Foundation nih inn 50 a sakpiakmi  hna cu February 19 ah honnak a tuah theih theih a si.

Paletwa peng chung buainak ruangah Thantlang peng Tikir khua i Chin ralzaam hna zei bantuk dirhmun dah an um i, zei bantuk ti le rawl an ngei timi chim phuannak. Chin ram kulh, Paletwa peng ah Kawl ralkap le Rakhine ralkap AA i kah dohnak a chuah ruangah Chin ralzaam130 hna cu 2019 November 15 ahkhan an umnak Meeza ralzaam buk in Tikir khua ah an rak i ṭhial.

“Tikir khua ahcun ral a um lo tikah a nuamh cu a nuam ngai ko. Asinain kanmah lei umnak hmun he aa khah lo tikah ti le mei kongah kan harsa deuh ngai ko i hi hmun ah hin cun zei hmanh ṭih ding a um lo i a nuam ngai” tiah Paletwa peng in Tikir khua ah a rak i ṭhialmi Chin ralzaam chungin Con Sang nih cun a chim.

Paletwa peng in Tikir khua ah a rak i ṭhialmi Chin ralzaam caah umnak hmun ramri le tlang cungmi ṭhanchonak zung pakhat a simi Nah-tah-lah nih inn 23 an sakpiak hna. An ei dingmi ti le rawl hna cu ramchung ramleng ah a ummi Chinmi hna nih Chin ramkulh Acozah le mipi hna nih bawmhnak an pekmian ei din hna.

“Kanmah nih kan duh bikmi cu saṭil te hna zua kho u sih law hi ka hin caan saupi um ding ahcun Saṭial zuatnak nawl zong kan pe hna sehlaw ttha. Cun tawlreba hna cin kho usih law tiah kanmah lungthin a ummi le kan lungput cu a si. Cuti silo ahcun kan paw cawnak ding kan i hmuh kho lai lo.”

“Kanmah lei ahcun kum fatin lo a vat lengmangmi kan si tik ah hin, hika lei ahcun kum fatin le kum chiar in lo vah awk zong a um tuk lai lo keimah ruahnak ahcun” tiah Con Sang nih cun amah ruahnak le lungput a ngeihmi pawl cu a chimchap.

Chin Ralzaam hna hi a hlan i an umnak le khuasak nak ah cun tiva (tipi) he an i neih tuk ruangah dawh chungin ti an hmang kho. Tikir an vun i ṭhial tikah Tikir cu tlang cung a si bantukin ti leiah harnak tampi an ngei tiah an chim hi a si.

” Chin ralzaam hna nih Paletwa lei ramṭha ah a ummi an si tikah Tikir i an hung phak tikah ah hin Tikir hi a kiknak hmunhma a si tikah an ram he aikhat lo tikah hmailei an i cawm pawmnak caah khua kan khanpiak hna lai tiah kan timi cu khuami hna he hmunkhat ah cinthlak pi hna u sih ti hi saduh kan thahpiakmi hna cu a si” Tikir khua Bawi Pu Lian Thang nih cun a chim.

“Chin ralzaam hna i an um balnak hmuh i a ummi an si tikahm khuami hna nih ti leiah siseh, an ei din dingmi ti rawl kongah siseh Committee dirh a si i an caah a herhmi thil kan si khawh tawkin kan tuahpiak hna” tiah Tikir khua Bawi Pu Lian Thang nih a chim.

“Kum 98 ka si i Tikir khua ah kan umnak hi a sau rih lo. Kan hnu kum November thla ah a rak ummi kan si. Anmah phang loin a kan chiah i a herh kip in a tuahpiak a kan bawmh i nuam tein kan um ko. Inn zong anmah nih a kan sakpiakmi a si” tiah Tikir khua ah Chin ralzaam in a rak i ṭhialmi Pu Ton Erth nih a chim. Chin World

Nawlnak: Kan  Website dangah Copy Paste piak lo dingin kan in nawl hna.