Mandalay Region Chief Minister Dr. Zaw Myint Maung le Rakhine State Chief Minister U Ngi Puh hna cu ram minchiatnak petu case an ti i Defamation Law hmangin case siampiak an si. Dr. Zaw Myint Maung hi nizan ah khan rampi le ram hruaitu min chiatnak Defamation law Section 505 (b)-nak hmangin sase siampiak a si i, NLD cathanh chuahmi he pehtlaihnak an ngaih ruangah mah case hi awrhter an si.

NLD central E.C nih hin cathanh chuah mi 5 an ngei i, mah nih hin atu ralkap cozah a ttuan lio mi a hnursuan lawng si loin rampi himnak a derthawm pin ah mipi pawl sualnak tuahter le tthihpheih an timh hna tiin case hi awrhter an sinak cu court nawlngeitu pakhat nih a chim. U Ngi Puh zong hi a cunglei langhtermi case tthiamtthiam hi awrhter a si. Mah case an tuahpiak mi hna ah nawlngeitu nih an sual ko an ti ahcun a tlawmbik kumhnih thongthlak a si lo le phaisa in cawiter an si lai. Credit: VOA Burmese.

Relchih: US state ah a lin biknak state, Texas cu khuasik nih a den hna. Electric a rawk, ti pipe a kak dih i, minung tampi khuasik tuar in an vai. Cu lio ah Senator Ted Cruz cu a chungkhar he a lumnak Mexico ah an zam. US media ah Ted Cruz mawhchiatnak cu a khat colh. Mipi nih sandah an piah hnawh.

Mipi caah riantuanmi nih mipi zawn a ruat lo an ti. An soisel ning a fak tak. Cucaah a zamnak in a rak kir i, “ka palh e” tiah ngaithiam a hal hna. “Ka fanu nih Ni 2 chung khuasik a tuar ka zoh khawh lo caah, pa dirhmun in ka fanu caah ka tuahmi a si e” tiah a ti. Chin miphun chung in Ralkap duhnak a zultu Pu NSA hi fakpi in a miphun hawi nih kan mawhchiat ve i, cu mawhchiatnak cu theih in Mipi duhnak tuah ah Ted Cruz bantuk in a von kir ve te hnga maw? “Ka palh e” a ti kho ve te hnga maw?

Chin Miphun chung in Law degree in Ph.D kan ngeih chunh Dr. NCL cu Ralkap ruahnak petu ah a min aa tel e tiah Chin miphun nih an mawhchiatnak dirhmun in “ka tel lo e” tiah a von kir ve te hnga maw?
Miphun le ram caah riantuantu/ public’s servant vialte chung in Mipi duhnak hi hmasabik ah a chiami hruaitu paoh hi Miphun le ram a dawtu true public servant cu an si. By Zasang Cinzah