Pu Sui Ṭhio nih Pu Tin Bawi te chungkhar a tuahto hna ning cu lung a fak tuk hringhran. Thil sining chungkhar asimi Pu Tin Bawi le Pi Ngun Tha Tling te nupa hna nih an chimmi cu ngaihchia ngaingai asi ko. Chin cozah nih Hakha inn an hrawh lai ah nanmah tein inn ai theh mi cu cozah nih inn hmun kan in pek hna lai tiah chungkhar pawl hna cu biakamnak an rak tuah hna.

Culio ahcun Pu Tin Bawi te chungkhar hna zong cozah nawlchuah ning le cozah nih an tuahmi ning tein an rak zulh ve i, an inn cu an theh ve. Cun an inn an ṭhehnak hmanthlak tete cozah sin ah theihternak ṭha tein an tuah. Caan a hung liam deuh tikah inn hmun pek le pek lo kong zeihmanh cozah nih thawngthanhnak an tuah lo tikah anmah tu lutlai hna sin ah an kal.

Sipin lei ah caan zeimawzat an kal cang nain a hnu ah Sipin nih,“Kanmah kut ah a um ti lo e, Sui Ṭhio kut ah a um cang i, amah sin ah vakal ulaw,tiah an ti hna. Pu Tin Bawi te chungkhar hna cu Sui Ṭhio sin ah an vakal. Sui Ṭhio nih,“ Zeihmanh nan ca a um lo, tiah a ti hna. Asinain chungkhar lei nih,“Ṭha tein kan up dih cang mi asi a um ko lai, tiah an ti i, Sui Ṭhio nih cun a kawl i, an ca cu a hmuh.

Sui Ṭhio nih a timi hna cu,“Khah hnangam tein va um ko uh, tiah a ti hna i, hnangam ngai in chungkhar hna cu an lawi. Sihmanhsehlaw caan a vun rauh deuh tik ahcun thawngpang zeihmanh an um lo tik ah chungkhar hna cu an va kal ṭhan. Sui Ṭhio nih cun,“Nan ca a um lo, tiah a rak ti ṭhan hna. “Kan rak rat lio zongah pei kan ca a um cu na hmuh ko kha tiah lehnak an tuah i, Sui Ṭhio nih cun aw si tak tiah aleh ṭhan hna.

Chungkhar hna nih Pastor an i sawm i, khah kan ruahpiak ko hna lai tiah bia acah hna i, chungkhar cu an lawi ṭhan. Thawngpang zeihmanh a um bal hlei lo tikah chungkhar hna nih Pastor pahnih an i sawm i, Sui Ṭhio ton ahcun an va kal ṭhan. Cu ahcun Sui Ṭhio cu alin in aling cang. “Nan ca a um lo mi cu zeitindah kan tuah piak hna lai, Kai manh lo va ṭin uh, tiah Pastor te hmaizah loin ui ṭhawl le ar ṭhawl in a ṭhawl hna.

Sui Ṭhio nih cun,“Min thut a um lo, tiah ati ṭhan hna i, min senthut mi ca he an i ken ko nain zeihmanh ah Sui Ṭhio nih a relpiak hna lo. Sui Ṭhio cungah chungkhar cu an ngeih a chia ngaingai. Chungkhar pa bik Pu Tin Bawi zong nih aliamcia thimnak ah khan biatak tein a cawlcang ngaimi ka si ve. “Ka inn hi ting 130 in ka cawksak mi asi i, ka thih hlan lo mah tangka hi ka hmu kho ti lai lo,“ tiah a chim chih. Tlamtling tein video ah rak ngai ve.