Tappi meici ruang ah Thantlang ah inn khat ciam dihlak in a kaang. Chin Ramkulh, Thantlang khuapi ah 2021 January 21 zinglei sang, tappi meici ruang ah inn pakhat a kaang, minung hliam a tuar mi tu cu an um lo tiah Thantlang meithat zung in thawng kan theih. Atu inn a kanghnak hi Thantlang No.3 sang Pu Ram Ceu Thang inn dot hnih a si. A kanghnak a ruang zong hi tappi mei an kau mi meici in aa thok mi a si tiah kan theih.

Hi kong he pehtlai in Thantlang Meithat Zung Lutlai Pu Hmung Hnin nih, “Inn a kanghnak hi Thantlang khua luh lai Laipawng lung phak hlan ah a si. Inn a kangh hi zinglei suimilaam 2:00 tluk ah a si. Hi inn kangh ruang ah hliam a tuar mi cu an um lo. Cun, tangka in zeizatdah an sungh ti zong kan thei kho rih lo. Inn a kangh ahhin anmah an um lo. Khualeng deuh i a ummi an si ca ah khuachung lei an um kar ah a si,” tiah The Hakha Post ah a chim.

Inn a kangh le cangka in thawng an thanh hna i Thantlang meithat zung in motor pahnih, ti phurtu motor pakhat in an va fuh colh hna i suimilaam 2:30AM ah an phalh dih tiah kan theih. Hi inn kangh ruang ah inn ngeitu Pu Ram Ceu Thang cu (ပ) ၄/၂၀၂၀ pohma 285 in Thantlang Palek sakhan nih dan an tat lai tiah theih a si. Source: The Hakha Post

Hmuhning-Kan Caholh a thanchotertu le a hrawktu HLA

By: Salai KB Thawng

Hla le ring-awn ti mi hi ramri a ngei lo (a music never have boundary) tiah Mirang nih phung an thluk. Cucu a dik mi a si. Aruang cu, asullam kan hngalh lo mi Mirang hla, Kawl hla le Kala hla tibantuk zong nih kan thinlung ah rian a tuan khawh i kan i nuamhnak an si tawn.

Amah belte, kan Caholh a thanchotertu le a hrawktu zong a si, tiah ka ruah tawn mi cu HLA hi a si. Hi ka tial ruang ah a ka huatu nih ka hua len te ko u. Lai caholh a dirkamhtu pakhat dirhmun in nan ka huat len zong ah ka zeipoi lo.

Atu ahcun Pathian thangthatnak hlasatu hna khi hlasakthiam ti an si rua lo. Gospel Singer ti deuh khi an si dih cang. Hla fung hnihkhat a sa mi zong nih anmah le mah kha singer (hlasakthiam) ah an i ruat taktak. Amah belte, a satu le a phuahtu nakin edit tuahtu kan palh deuh tawn theo.

Hla cu ramri a ngei lo kan ti cang. Ngakchia zong nih an i by-hearth khawh i asullam an hngalh lo bu ah an thiam khawh mi Lai caholh cawnnak tha bik pakhat a si. Asinain, edit tuahtu nih hla an sak mi kha Kawlte nih sar-dan-htoo (catialchih) an ti bang an tialchih mi pawl zoh pah in ngaih ahcun ka awlokchong ngaingai.

Nihin ahcun Chinmi zatceo nak tlawm deuh hi ramleng kan phan dih cang. Kan fale (3rd and 4th generation tiang khi hei bih hmanh) nih kan Lai caholh an thiam set ti lo cu mu. An thiam nakhnga Laica chimh le cawnpiaknak nakin hla nih hin a cawnpiak khawh deuh tuk hna lai. Zeicahtiah, ring-awn cu ramri a ngeihlo ca ah an fianlo bu in an i by-hearth khawh mi a si.

Asinain, nihin video asiloah YouTube channel tehna i kan hmuh, kan ngaih mi hla pawl cu cafang nan tialchih mi pawl nih khin Laica cafangfonh le then (Word combination) a hrawh ngaingai. A phuahtu zong nih biafang kan hman mi pawl hi zohfel hmasa usih. A satu hrim nih cun biafang khek lak in sak khawh a hau.

Cun, pakhat ka siaremlo mi vun tenh ka duh. Hla kan sak mi video kan i thlak tik ah miphundang nih thuamthil tampi an i thleng lengluang lo. Laimi tu hi a rum bik kan lo. Video pakhat thlak ah thilpuan voi 3 tal kan i thleng dih. Hi bantuk pawl ruang ah hin video thlak a duh tuk nain zapi zaraan cu video an i thla ngam lo— an thla kho lo.

Cun, “Sifak santlailo” ti phun hla hei sak tung i taih-inn tha pipi ah lemcang (tazuksawng) le video i thlak khi zei ah hme kan rel? Na hla he aa tlak mi hmun le hma kawl awk maw na hngalh lo. Mirum le bawi inn rumro, hmunhma tha pipi rumro ah video kan i thlak tawn khi cu nihchuak deuh kan si rua ka ti. Laimi kan sining le dirhmun (standard) nan niamter ngaingai.

Hiti ka ti tik ah Gospel Singer lawng tinak a si lo. Love song sa mi zong zeihlei hlah! Tlukceo le keucheu lawngte. Thilpuan than pipi atuletu i thlen bu le hmunhma rem pipi thim in hlasak i tim duh hlah! Mi mit kan kem lehlam lai. “Sifak santlailo dawtu Pathian,” ti phun hlasak riangmang i thilpuan tha pipi atuletu i thlen, taih-inn special ah video i thlah rih—ningzak in. Love song satu zong cu thiam kan si ko. Hmuntha le inntha lawngte kan ngeen ve ko cuh!

Ka bia ka fun lai. Hla cu ramri a ngei lo, tiah ka chim cang bantuk in kan fale holh thiamka hmanh nih an i cinken khawh mi le an thiam khawh mi Lai caholh cawnnak tha bik cu HLA hi a si. Asinain, a phuahtu, a satu, le edit tuahtu nih kan cafang umtuning (a then le a fonh) hi thiam deuh usih. Zohfel deuh usih.

Pu Richard Zatu bia bang, “Kan miphun a nun khawh peng nakding cu kan nunphung le kan laam te hna hi an si lo. Kan caholh tu a si deuh,” a ti bang, kan caholh a biapitnak le kan thuamthil dawh bik a si mi kan caholh tanh zia thiam chinchin ding ah kan sawm hna. Source: The Hakha Times

_____

Copyright © Chin World News Evening